Алматыда Қазақстан Кедендік брокерлер қауымдастығының 25 жылдығына арналған конференцияға Қазақстан мен ЕАЭО елдерінен мемлекеттік органдардың, халықаралық ұйымдардың, салалық қауымдастықтар мен бизнестің өкілдері қатысып жатыр.
Кедендік брокерлер қауымдастығының мерейтойлық кездесуі әлемдік саудадағы жаһандық өзгерістер мен кедендік процестерді цифрландыру жағдайында бірыңғай тәсілдерді әзірлеу және практикалық тәжірибе алмасу үшін маңызды кәсіби алаңға айналды.
«Атамекен» ҰКП Төралқа Төрағасы Райымбек Баталов қауымдастықтың саланы дамытудағы маңыздылығын атап өтті, бизнес пен мемлекет арасында, әсіресе біз, кәсіпкерлер күн сайын бетпе-бет келетін сыртқы сауда мәселелерінде берік көпір және пәрменді диалог құруға дайын екенін айтты. Оның айтуынша, қауымдастық цифрландыру және кедендік процестерді жеңілдету бойынша көптеген бастамалардың басы-қасында жүр. «Сіздердің басшылығыңызбен бүгін электронды сауданы дамыту мен кедендік өкілдерді санаттаудан бастап пост-кедендік бақылау мен дауларды сотқа дейінгі реттеуге дейінгі маңызды тақырыптар талқыланатын болады» дейді Райымбек Баталов.
«Атамекен» ҚР ҰКП Кедендік әкімшілендіру департаментінің директоры Дина Мамашева Қазақстан экономикасындағы кедендік брокерлердің рөлін атап өтті: Оның айтуынша, кедендік брокер — кедендік ресімдеу мен бақылау нарығындағы негізгі ойыншы. Бұл саладағы заңнама айтарлықтай күрделі және брокерлер бизнеске декларацияларды дұрыс толтыруға, нормативтерді түсінуге және оларды әзірлеуге қатысуға көмектеседі.
Ұлттық кәсіпкерлер палатасының жұмысы туралы айта келе, ол:
«Атамекен» ҰКП-да кедендік әкімшілендіру департаменті жұмыс істейді, ол брокерлермен ғана емес, сыртқы экономикалық қызметтің барлық қатысушыларымен де жұмыс істейді. Біз кәсіпкерлерге нақты мәселелерді шешуге көмектесе отырып, жүктерді шекара арқылы өткізу, ішкі тексерулер, заңнама және кедергілерді жою мәселелерімен айналысамыз. Брокерлік салада да біз ерекше тығыз жұмыс істейміз «, деп сөзін түйіндеді.
