Алматыда жаңа метро желісін салуға дайындық жүріп жатыр. Бұл үшін қалада жер телімдерін сатып алу және үйлерді бұзу жұмыстары басталады.
- Жаңа тармақ Панфилов көшесіндегі «Жібек жолы» станциясынан басталады.
- Соңғы аялдама Алматы әуежайы болады.
Желі Гоголь көшесінің бойымен Орталық мәдениет және демалыс саябағына дейін өтеді. Одан кейін метро ВОАД-пен, одан әрі Құлжа тас жолымен әуежайға қарай жүреді.
Бұл бағытта барлығы сегіз станция жоспарланған.
Маршруттың жалпы ұзындығы 14 км құрайды. Үйлер мен учаскелердің меншік иелеріне нарықтық құны бойынша өтемақы төленеді. Мемлекет мұқтажы үшін учаскелерді сатып алуды «Қала жер орталығы» басқармасы жүргізеді. Оларды 2028 жылға дейін алу жоспарланған.
Оның алдында Алматыда метрополитеннің екінші желісі жобасының қоршаған ортаға әсерін бағалау бойынша қоғамдық тыңдау өткен болатын.
«Метрожоба» ЖШС бас инженері Ақылбек Досымовтың айтуынша, 14 шақырымға жуық жаңа желі «Жібек Жолы» станциясынан әуежайға дейін созылады. Онда орташа есеппен 1,5-1,8 километр аралықтағы сегіз станция орналасады.
Құрылыс жұмыстарының басталуы 2027 жылдың сәуіріне жоспарланған, жобаны 2031 жылдың сәуірінде аяқтау көзделіп отыр. Ұсынылған кестеге сәйкес, барлық сегіз станцияны бір мезгілде пайдалануға беру көзделген.
Желіге қызмет көрсету үшін 13 пойыз сатып алу жоспарланған. Қарбалас уақытта құрамдардың қозғалыс аралығы 4,5 минуттан аспайды, қалған уақытта — тоғыз минутқа дейін. Сондай-ақ, жобада барлық станцияларда дәретханаларды жайластыру көзделген.
- Бірінші іске қосу кешеніне әуежай ауданындағы, Нұршашкан шағын ауданындағы, «Апорт» СОО-ға қарама-қарсы, сондай-ақ «Восточный» көлік-ауыстыру торабының аумағындағы станциялар кіреді.
- Екінші кезең «Халық Арена» ауданында және Шығыс айналма автожолының Орынбор көшесімен қиылысында станциялар салуды көздейді.
- Үшіншісі Горький атындағы орталық парктің жанындағы станцияны және жұмыс істеп тұрған «Жібек Жолы» станциясының жанындағы ауыстыру станциясын қамтиды.
Техникалық-экономикалық негіздеме қалалық қызметтермен келісілді және жақын арада мемлекеттік сараптамаға жіберіледі. Құрылыс барысында 2541 ағаш пен 134 бұтаны кесу жоспарланған.
Алдын ала есептеулер бойынша, жобаны жүзеге асыру шамамен 1,2 трлн теңгені құрайды.
