Қазақстан қор биржасында (KASE) бүгіннен бастап әлемдегі жетекші технологиялық компаниялар — Alibaba Group Holding Ltd және Baidu, Inc. компанияларының америкалық депозитарлық қолхаттарымен (ADR) сауда-саттық ашылды.
KASE Global алаңында инвесторлар үшін BABAd (Alibaba ADR) және BIDUd (Baidu ADR) бағалы қағаздары қолжетімді болады, олардың бағасы АҚШ долларымен белгіленеді. Бұл құралдар бойынша маркет-мейкер болып «Standard» инвестициялық компаниясы» АҚ тағайындалды, оған KASE-де ресми түрде маркет-мейкер мәртебесі берілген.
«Alibaba мен Baidu америкалық депозитарлық қолхаттарының KASE-де пайда болуы жай ғана құралдар желісін кеңейту емес, бұл – инвесторлар үшін азиялық нарықтардың технологиялық өсімімен үйреншікті инфрақұрылымда, айқын баға белгілеу арқылы тікелей жұмыс істеу мүмкіндігі», — деп атап өтті KASE Басқарма төрағасының орынбасары Айнагүл Ысқақова.
Осылайша, KASE жаһандық нарықтардың қолжетімділігін арттыруды жалғастырып, инвесторлар үшін жаңа инвестициялық мүмкіндіктер көкжиегін ашады.
