17 наурыз күні Ұлттық банк доллардың ресми бағамын 486,2 теңге деңгейінде белгіледі. Алдыңғы күнмен салыстырғанда АҚШ ақшасы 5,09 теңгеге арзандады.
Бірінші кредиттік бюроның сарапшылары мұндай деңгей соңғы рет 2024 жылдың 28 қазанында болғанын айтады.
Теңге наурыз айынан бастап тұрақты түрде өсті. Долларға шаққанда 2,3 пайызға (11,36 теңгеге) қымбаттаса, жыл басынан бері нығаю деңгейі 3,8 пайызды (19,33 теңге) құраған.
Сарапшылар теңгенің нығаюын әлемдік нарықтағы мұнай бағасының көтерілуімен байланыстырып отыр. Бұған Таяу Шығыстағы шиеленіс әсер етті.
АҚШ пен Израиль Теғранның инфрақұрылымына соққы жасаған соң, Иран Ормуз бұғазындағы кеме қозғалысын іс жүзінде тоқтатып тастады.
«Нәтижесінде Парсы шығанағы елдерінен тасымалданатын мұнай көлемі шектелді. Қазір Лондындағы ICE биржасында Brent маркалы мұнай бағасы барреліне 100 доллардан жоғары деңгейде тұр», – делінген сарапшылардың хабарламасында.
Еуро бағамы 557,82 теңге болса, Ресей рублі 6 теңгеге дейін арзандады. Бұл соңғы жыл ішіндегі ең жоғары көрсеткіштерге жақын.
