Энергетика министрі Ерлан Ақкенженов төртінші мұнай өңдеу зауытын салу мәселесі пысықтала бастағанын хабарлады.
Зауыт алаңы ретінде Ұлытау, Атырау және Маңғыстау облыстары қарастырылуда. Қазір консультанттар жұмыс істеп жатыр, жыл соңына дейін техникалық-экономикалық негіздемесі аяқталады деп күтілуде.
Одан бөлек, қолданыстағы зауыттардың қуатын арттыру жоспары бар. Атап айтқанда, Шымкент зауытының қуатын 6 миллион тоннадан 12 миллион тоннаға дейін екі есе ұлғайту көзделіп отыр. Оның техникалық-экономикалық негіздемесі де жыл соңына дейін әзірленіп, нақты іске көшу жоспарланған. Ал Атырау зауытын 2 миллион тоннаға кеңейтіп, дизель отынын тазартатын қосымша желі салу ойда бар.
Министр мұның бәрі ішкі қажеттілікті толық жабуға мүмкіндік береді деп отыр.Оның дерегінше, былтыр 18,4 миллион тонна мұнай өңделіп, 15,5 миллион тонна дайын өнім алынған. Бұл ішкі сұраныстың 90 пайыздан астамын жабады. Дегенмен авиаотын мәселесі әлі шешілген жоқ.
Еліміз жыл сайын Ресейден 300 мың тоннаға жуық авиаотын тасиды. Себебі еліміздегі 25 шағын зауыттың ешқайсысы Кеден одағының талап ететін 4-сыныптан кем емес сапаға сай отын шығармайды.
