Қазақстан Республикасы Қаржы нарығын реттеу және дамыту агенттігі қарыз алушыларға кредиттерді мерзімінен бұрын өтеу тәртібі туралы еске салып, заңнамадағы алдағы өзгерістер туралы хабарлады.
Мерзімінен бұрын өтеу қарыз алушыға пайыздар бойынша артық төлеуді азайтуға және борыштық міндеттемелерді тезірек орындауға мүмкіндік береді. Ол барлық берешек жабылғанда толық немесе кестеден тыс қосымша сома енгізілгенде ішінара болуы мүмкін. Ішінара өтелген жағдайда ай сайынғы төлем мөлшерін сақтай отырып, кредит мерзімін қысқартуға немесе қарыз мерзімін бұрынғы қалдырып, төлемнің өзін азайтуға болады.
Өзгерістер күшіне енгенге дейін банктер:
- бір жылға дейінгі мерзімге қарыздар бойынша алғашқы алты ай ішінде және бір жылдан астам мерзімге қарыздар бойынша бірінші жыл ішінде айыппұл санкцияларын қолдануға құқылы.
- Бұдан басқа, кредиттік ұйымдар заңнама шеңберінде мерзімінен бұрын өтеудің өз тәртібін белгілейді.
- Қарыз алушыларға қайта есептеу шарттарын банкпен алдын ала келiсу, қаражатты есептен шығару тәртiбiн, сақтандыру сыйлықақыларын қайтару және ипотека бойынша ауыртпалықтарды алып тастау ерекшелiктерiн нақтылау ұсынылады.
31 тамыздан бастап мерзімінен бұрын өтегені үшін айыппұл санкциялары заңды тұлғаларға ғана қолданылатын норма күшіне енеді
- Жеке тұлғалар кез келген уақытта тұрақсыздық айыбын төлеместен кредиттерді толық немесе ішінара жаба алады.
- Бұл норма бұрын жасалған шарттарға да қолданылады. Алайда өзгерістер енгізілгенге дейін төленген айыппұлдар мен тұрақсыздық айыбы қайтарылуға жатпайды.
Агенттіктің мәліметінше, мерзімінен бұрын төленетін төлемдер қарыз алушыларға борыштық жүктемені азайтуға, қаржылық тұрақтылықты нығайтуға және кредиттік тарихты жақсартуға көмектеседі. Сонымен бiрге мерзiмiнен бұрын өтеу туралы шешiм қабылдау алдында қаржы резервiнiң болуын және бос қаражатты пайдаланудың ықтимал баламалы тәсiлдерiн ескеру ұсынылады
