Президент төрағалық еткен Үкіметтің кеңейтілген отырысында премьер Бектенов мемлекет әлеуметтік міндеттемесін толық көлемде орындап отырғанын мәлімдеді. Оның айтуынша, түрлі әлеуметтік төлемдердің тым көп әрі жүйесіз берілуі, оған қоса бақылаудың әлсіздігі бюджет шығыстарының негізсіз артуына себеп болған.
Салдарынан мемлекет қаражаты тиімсіз жұмсалып, кей жағдайда тіпті ашық талан-таражға түскен.
Биылдан бастап жеңілдіктер мен қолдау бағдарламалары тек жұмыс күші жетіспейтін аймақтарға баратын адамдарға іріктеліп беріледі.
«Білім беру, денсаулық сақтау, әлеуметтік қорғау, мәдениет пен спорт саласындағы мемлекеттік саясатты қайта құру бюджеттен бөлінетін 18 трлн теңге көлеміндегі қаржының жүйелі жұмсалуына мүмкіндік ашады. Үкімет көмекті тек мұқтаж жандарға беруді қатаң ұстаным ретінде қарастырады», – деп түйіндеді Олжас Бектенов.
Премьер-Министр Олжас Бектенов қаңтар айының басында кеңестер емес, нақты нәтижелер талап етуді қолға алатынын айтқан болатын. Оның айтуынша, барлық орталық және жергілікті мемлекеттік органдар, ұлттық компаниялар оларды табысты іске асыру үшін бар күш-жігерін жұмсауы қажет. «Сөзден іске көшу керек. Барлық мәселелерді шешуге прагматикалық тұрғыда қарап, бюджет қаражатын барынша үнемдеп, нақты нәтиже беру керек. Есептер мен көрсетілімдерді тоқтатыңыз. Егер нәтиже болмаса, бұл жай ғана сөз. Егер жаңаша жұмыс істей алмасаңыз, ашық айтыңыз, біз бұл мәселелерді шешетін боламыз», деді Олжас Бектенов
