Қаржы мониторингі агенттігі төрағасының орынбасары Қайрат Бижановтың айтуынша, азық бағасын тұрақтандыруға байланысты мәселелеріне айрықша назар аудару керек.
- Сауда үстемелерін көтеру фактілері бойынша әкімдіктерге 800-ден астам материал жіберілді.
- 100 делдалдық буын алынып тасталды, 366 адам әкімшілік жауапкершілікке тартылды.
- Оларға 35 млн теңге айыппұл салынды. Бұл ретте жекелеген мемлекеттік органдар әлеуметтік маңызы бар тауарларды 100%-ға дейін үстеме бағамен сатып алды.
- Тексеру нәтижелері бойынша әкімшілік жауапкершілікке 47 лауазымды тұлға тартылып, 14 млн теңгеге айыппұл салынды.
- Осыған байланысты мемлекеттік мекемелерді өнімді емес делдалдарды қоспағанда, тікелей өндірушілерден немесе ресми дистрибьюторлардан тауар сатып алуға міндеттеу ұсынылды.
«Соңғы екі жылда біз субсидиялау саласында 120-дан астам қылмыстық істі тіркедік. Атап айтқанда, Алматы облысында 3,3 млрд теңге субсидияны ұрлауға күдікті Ауылшарминінің бұрынғы қызметкері мен мәслихаттың экс-депутатына қатысты іс тергелуде. Бұдан басқа, бірқатар өңірлерде қарыздар бойынша сыйақы мөлшерлемелерін субсидиялау кезінде және техниканы лизингке сатып алу кезінде 11 млрд теңгеге қаражатты тиімсіз жұмсау жағдайлары анықталды, 4,2 млрд теңге төленді. Мұндай фактілер бақылау мен мониторинг тетіктерін жетілдіру қажеттігін көрсетеді», — деп есептейді Қ. Бижанов.
Осыған байланысты АФМ төрағасының орынбасары Ауыл шаруашылығы министрлігінің ақпараттық жүйелерімен қаржы мониторингін интеграциялау жөніндегі жұмысты жеделдетуді ұсынды.
