Бүгін Алматы соңғы жарты жылдықта қазақ балаларының эталонына айналған Қожамен қоштасты.
Қазақстан Жазушылар одағында көрнекті кино актері, сценарист, кинодраматург, философ, Қазақстанның еңбек сіңірген қайраткері Нұрлан Санжарұлы Сегізбаевты соңғы сапарға шығарып салу рәсімі өтті.
Қаралы жиынға марқұмның туыстары, жақындары, әріптестері, қаламгерлер, сондай-ақ Нұрлан Сегізбаевтың шығармашылығын қадірлеген қалың жұрт жиналып, «Менің атым Қожа» атты аңызға айналған фильмнің кейіпкерімен қоштасты.
Қоштасу рәсіміне Қазақстан Жазушылар одағының төрағасы Мереке Кұлкенов, әл-Фараби атындағы ҚазҰУ журналистика факультетінің деканы Қуат Әуесбай, Алматы қаласы әкімдігі өкілдері және мәдениет саласының бірқатар қайраткерлері қатысты.
Жиын барысында Мереке Кұлкенов Премьер-министрдің орынбасары – Мәдениет және ақпарат министрі Аида Балаеваның көңіл айту хатын оқып берді.
Сондай-ақ әріптестер атынан Шәкен Айманов атындағы «Қазақфильм» ұлттық киностудиясы» АҚ президентінің міндетін атқарушы Айдар Омаров сөз сөйлеп, марқұмның отандық кино өнеріндегі орнына тоқталды.
Қоштасу рәсімінде сөз алған Болат Ғалымбетов бала күннен бірге келе жатқан досының арманда кеткенін айтты.
«Жасыратын несі бар?! Бізге кішкене ренжіді ғой. Себебі оған дұрыс көңіл бөлінген жоқ. Керемет-керемет сценарийлары іске аспай қалды. Ол өзінің өмірінің аз қалғанын сезді. «Маған қашан мүмкіндік береді?» дейтін. Сосын өзім де кино түсіре алмай жүргенімді айтатынмын»,- дейді актер әрі кинорежиссер Болат Ғалымбетов.
Актер біздің тілшімен сонгы рет 13 желтоқсанда хабарласып, «Қызыл қар» романының екі тілде жарық көргенін, барлығы сатылып кеткенін айтқан.
«Жағдайым жақсы емес. Күнімнің таяу екенін сеземін. Келесі жылы желтоқсан оқиғасына 40 жыл толады, бірақ менің Алажар романы мен сценарийінің авторы екенімді ешкім білмейді. Мұны жас журналистерге еске салыңызшы? Кітап 35 жылдан кейін екі тілде жарық көрді», деп жазды ол соңғы жазбасында.
Ол сондай-ақ Жазушылар Одағы мүшелігіне өткенін де айтқан.
Айта кетейік, 26 желтоқсан күні қалың қазаққа «Менің атым Қожа» филімінде басты кейіпкер Қожа бейнесімен танылған актер, сценарист және кинодраматург Нұрлан Сегізбаев бақилық болған еді.
Міне бүгін Дүниежүзілік кино күнінде жақындары оны ақтық сапарға шығарып салды. Марқұм тірі болғанда, қаңтардың 28-не, 75 жасқа толар еді.
