Үкіметтің апта сайын әлеуметтік маңызы бар азық-түлік тауарларының құны өсетін өңірлерді қадағалап отыратыны Премьер-министрдің орынбасары — ұлттық экономика министрі Серік Жұманғариннің төрағалығымен өткен кеңесте белгілі болды.
Ақпан айының басынан бастап бағаның орташа өсу индексі 0,5 пайызды құрады, бұл өткен жылдың сәйкес кезеңіндегі көрсеткіштен екі есе төмен (1 пайыз). Мемлекет басшысының инфляцияны тұрақтандыру жөніндегі тапсырмасын орындау шеңберінде министрлер кабинеті апта сайынғы кеңестерде баға ең көп өсетін өңірлердегі жағдайды нүктелі қарауды шешті. Маңғыстау облысында қызанақ, сиыр еті, айран, сары май, картоп қымбаттады. Бұл өңірде ашыған сүт өнімдерін өндіретін, етті қайта өңдейтін, ұн мен нан өндіретін ірі кәсіпорындар жұмыс істейді, алайда көкөніс өндірушілер жоқ. Бағаның өсуінің негізгі факторлары — күрделі логистика, тамақ өнімдерін өз өндірісінің жеткіліксіз көлемі және импорттық жеткізілімдерге жоғары тәуелділік. Бұдан басқа, онда көкөніс қорларын броньнан шығару жеткілікті белсенді жүргізілмейді.
Вице-премьер өңірдің негізгі өндірушілерінде бағаның өсу себептеріне егжей-тегжейлі талдау жүргізуді және сауда комитетімен және ҚТЖ-мен бағаны тұрақтандыруды тапсырды. Түркістан облысында тауық жұмыртқасының, сүт өнімдерінің, көкөніс пен еттің ірі өндірушілері жұмыс істейді. Онда тауық еті мен жұмыртқа өндірушілердің азық үшін арзандатылған ұнға қажеттілігі бар, бұл өнімнің өзіндік құнын төмендетуге және бағаны тұрақтандыруға мүмкіндік береді. Серік Жұманғарин «Азық-түлік корпорациясына» өңірді арзандатылған бағамен қажетті көлемде астықпен қамтамасыз етуді тапсырды. «Апта сайын біз баға өсімі байқалатын өңірлерді қарастыратын боламыз. Сауда комитеті қысқа мерзім ішінде бағаның өсу кезеңі мен орталық деңгейде қажетті шараларды анықтау үшін жеткізу арналарынан бастап әлеуметтік өнімнің әрбір түрін сатуға дейінгі жағдайды талдауы тиіс. Өңірлер бағаның өсу себептерін жедел анықтап, шешім қабылдауға міндетті, — деді Жұманғарин.
Барлық өңірлерге наурыз айының соңына дейін тұрақтандыру қорларындағы көкөністердің барлық қорын сатуды, ал Сауда және интеграция министрлігіне наурыз айының екінші жартысынан бастап ерте пісетін көкөністерді жеткізуді қамтамасыз етуді тапсырды.
