Премьер-министр Олжас Бектенов білім, денсаулық сақтау және қаржы министрліктерінің алдына жан басына шаққандағы қаржыландыру жүйесіндегі теңгерімсіздіктерді жою міндетін қойды.
Оқу құны жоғары жеке меншік ұйымдарға да назар аударылды.
Премьер-министр мемлекеттік бюджет оқу процесін толық көлемде қамтамасыз етуге мүмкіндік беретін ата-ананың ақы төлеу деңгейі жоғары «элиталық» деп аталатын мектептерді қаржыландыруға пайдаланылмауы тиіс екенін атап өтті.
Қаржы министрі Мәди Тақиев жекеменшік мектептерде мемлекеттік тапсырысты орналастырудың жаңа тетігіне көшу бойынша жүргізіліп жатқан жұмыстар туралы баяндады. Проблемалық мәселелерді шешу мақсатында жекеменшік мектептерді қаржыландыру процестері — шарт жасасудан бастап қызмет ақысын төлеуге дейін цифрландырылды.
ОртаBilim сервисінің деректеріне сәйкес, 2026 жылғы 6 қаңтардағы жағдай бойынша e-Qazyna.kz веб-порталында 789 жекеменшік мектепті (2025 жылы — 845 мектеп) қаржыландыруға 78,7 млрд теңге сомасына шарттар жасалды. Бұрын қаржыландырылғандардың ішінен 206 мекеме белгіленген талаптарға сәйкес келмеді. Оқушылар мен мұғалiмдердi тiркеу және екi рет есепке алу, рұқсат етiлетiн жобалық қуаттылықты арттыру және т.б. жағдайлар анықталды.
Аудит барысында мынадай алдын ала нәтижелер анықталды:
• 1 333 оқушының бір мектептен екіншісіне ауысуы 5-тен 12-ге дейін;
• 64 жекеменшік мектепте білім алушылардың нақты саны белгіленген жобалық қуаттылықтан екі еседен астам артық;
• 2024 жылы 167 жекеменшік мектеп бойынша салық есептілігінде кірістер көрсетілмеген. Аумақтық ішкі мемлекеттік аудит департаменттері хабарлама-хаттар жіберді, нәтижесінде мектептер 1,2 млрд теңге сомаға салық төледі. Қазіргі таңда 46 мектепте қарсы тексерістер жүргізілуде.
Жұмыстың келесі кезеңі мемлекеттік мектептерді (6 887 мектеп), балабақшалар мен университеттерді цифрландыру болады. Осылайша, бюджет есебінен көрсетілетін білім беру қызметтерін қаржыландырудың барлық циклінің ашықтығы қамтамасыз етіледі.
Кеңес барысында жеке меншік білім беру ұйымдарының қызметін лицензиялау тәсілдерін қайта қарау мәселесі көтерілді.
Жеке меншік ұйымдардың азаматтарға медициналық қызмет көрсету саласында тәртіп орнату мақсатында үкіметтік жұмыс тобы азаматтардан келіп түсетін өтініштерді ескере отырып, «Әлеуметтік медициналық сақтандыру қоры» АҚ активтеріне талдау жүргізеді. Нәтижелер бойынша сондай-ақ Қордың тиімділігін одан әрі арттыруға бағытталған шаралар қабылданатын болады.
Кеңес қорытындысы бойынша білім, денсаулық сақтау, қаржы министрліктеріне бір аптаның ішінде аталған мәселелерді шешу бойынша нақты ұсыныстар енгізу тапсырылды.
Үйлестіру премьер-министрдің орынбасары Аида Балаеваға жүктелді.
