Ұлттық құрылтайдың V отырысында Мемлекет басшысы Қасым-Жомарт Тоқаев Мемлекеттік кеңесші лауазымын жою жоспары бар екенін мәлімдеді. Президенттің айтуынша, бұл шешім мемлекеттік басқару жүйесін ықшамдау және аппараттық құрылымдарды оңтайландыру аясында қабылданып отыр.
Еске салсақ, Мемлекеттік кеңесшінің мәртебесі мен өкілеттігі туралы жарлыққа Президент 2022 жылғы маусым айында қол қойған болатын. Құжатқа сәйкес, Мемлекеттік кеңесші республиканың лауазымды тұлғасы саналады, оны қызметке Президент тағайындайды және қызметтен босатады. Мемлекеттік кеңесші Мемлекет басшысының тікелей басшылығымен жұмыс істеп, соған есеп береді әрі соның бақылауында болады.
Ұлттық құрылтайдың V отырысында Мемлекет басшы Қасым-Жомарт Тоқаев партиялардың Парламентке өту межесін 5 пайыздан 7 пайызға қайтару туралы пікірлерге қатысты өз ұстанымын білдірді,
«Партиялардың Парламентке өту межесін қазіргі бес пайыздан жеті пайызға қайтару қажет деген пікір айтылды. Бұл ереже кезінде Ұлттық қоғамдық сенім кеңесінің бастамасымен қабылданған болатын. Бес жыл бұрын енгізілген осындай өзгерістер сайлау заңнамасын жақсартуға едәуір септігін тигізді. Межені төмендету арқылы Парламенттегі ірі саяси күштердің үстемдігін азайтып, партиялар арасындағы бәсекені күшейтуді мақсат тұтқан едік. Бүгінгі таңда осы норманың тиімділігіне көзіміз жетті. Ел тарихында алғаш рет Мәжіліске алты партияның өтуі – соның айқын дәлелі. Сондықтан мен бес пайыздық межені қалдырған жөн деп санаймын», деді Қасым-Жомарт Тоқаев.
Президенттің айтуынша, ұсыныстардың төртінші бөлігі заң шығарушы органның жұмыс тәртібі мен рәсімдеріне қатысты болды. Жаңа Парламентте депутаттарды бес жылға сайлау көзделіп отыр.
«Заң қабылдаудың үш кезеңнен тұратын процедурасы ұсынылады. Депутаттар бірінші кезеңде заң жобасын жалпы мақұлдайды. Одан кейін өзгерістерді мақұлдайды, соңында заңды қабылдайды. Осылайша, біз Парламент қызметін түбегейлі қайта құру арқылы осыған дейін жүзеге асырылған саяси реформаларды одан әрі жалғастырамыз. Мемлекеттің институционалдық тұғырын нығайтып, «Күшті Президент – ықпалды Парламент – есеп беретін Үкімет» қағидатына сәйкес орнықты саяси жүйе қалыптастырамыз. Басты мақсатымыз да – осы», деді Мемлекет басшысы.
