Ішкі нарықтағы жағдайды 31 наурызға дейін және кейін деп салыстыру қалыпты жағдайға айналып барады. Одан кейінгі жағдайдың қалыптасатынын біз түгілі министрлер де айта алмайды екен.
Энергетика министрі Ерлан Ақкенженов Мәжіліс кулуарында мораторий күші жойылған жағдайда бензин бағасы қалай өзгеретінін айтты. «Егер 31 наурыздан кейін Үкімет жанармай құю бекеттерінің қызметіне араласпау туралы шешім қабылдап, нарықтық тетіктер жұмыс істейтін болса, онда баға қалыптастырудың одан арғы шарттарын ішкі сұраныс пен ішкі ұсыныс айқындайды. Біз жанармай бағасының күрт өсуіне жол бермейміз. Бұл шаралардың барлығы еліміздің қазіргі экономикалық жағдайына сай болады», – деді Ақкенженов.
Ақкенженов министрліктің бағаны тікелей реттеумен бір жылдай айналыспағанын атап өтті. «Министрлік 2025 жылдың 1 ақпанынан бастап нарықты реттеумен айналыспайды. Бір жыл болды. Бұл ретте біз бағаның күрт өсуіне жол бермейміз — бұл нарықтың қазіргі жағдайына сәйкес келеді», деп мәлімдеді ол.
Энергетика министрлігінің басшысы сондай-ақ бүгінгі таңда мораторий әрекет етуін жалғастыратынын, ал 31 наурыздан кейін нақты шешімдер туралы айтуға әлі ерте екенін нақтылады.
«31 наурыздан кейін жағдай қалай болады, менің қазір айтуға құқығым жоқ. Бүгінгі таңдағы баға мораторийдің демеуінде екенін дәл айта аламын», — деп қосты министр.
