Премьер-министрдің орынбасары Серік Жұманғарин депутаттардың әлеуметтік желілерде жүлде ойнатудың алдын алуға қатысты сауалына жауап бере отырып, «Лотереялар және лотерея қызметі туралы», «Жарнама туралы», «Ойын бизнесі туралы» және «Рұқсаттар және хабарламалар туралы» заңдары бойынша лотерея операторы емес тұлғаға лотерея өткізуге заңмен шектеу қойылғанын еске салды.
Оның айтуынша, іс-шаралар «Заң және тәртіп» медиа-жоспары аясында жүзеге асырылуда және азаматтардың құқықтық сауаттылығын арттыруға және әлеуметтік желілерде бұзушылықтардың алдын алуға (заңсыз лотереялар, жалған тренингтер мен күмәнді акциялардың алдын алу) бағытталған.
Сөзінің жалғасында Жұманғарин Мәдениет және ақпарат министрлігі ақпараттық алаңның ашықтығын қамтамасыз ету және алаяқтық схемалардың алдын алу үшін Instagram, TikTok, Meta-мен белсенді өзара іс-қимыл жасап жатқанын атап өтті.
Заңнамалық талаптар және цифрлық ортадағы заңсыз әрекеттердің ықтимал салдары туралы ақпараттық материалдар таратылады.
Заң бұзушылықтарды анықтау және жедел ден қою шараларын қабылдау мақсатында интернет-кеңістіктің тәулік бойы мониторингі жүзеге асырылады.
«2025 жылдың басынан бастап мониторинг барысында 1 870 интернет-алаяқтық фактісі анықталды, оның ішінде әлеуметтік желілерде 389 факті, 1 480 интернет-ресурс пен сілтемелерге қолжетімділік шектелді, интернет-казино қызметі бөлігінде 8 616, оның ішінде әлеуметтік желілерде 6 399 факт анықталды, 2 195 интернет-ресурс пен сілтемелер шектелді.
Заңға сәйкес, инфлюенсер (блогер) – белгісіз адамдар тобына арнап онлайн-платформада ақпарат жариялайтын және оны кәсіпкерлік мақсатта пайдаланатын адам. Қазақстан Республикасының заңнамасы инфлюенсерлердің кәсіпкерлік қызметін реттейді және цифрлық ортадағы заңсыз лотереялар мен басқа да құқық бұзушылықтар үшін жауапкершілік белгілейді», — делінген вице-премьер жауабында.
Жұманғарин қазіргі уақытта Қазақстандағы «Сәтті Жұлдыз» акционерлік қоғамы ғана ресми лотерея операторы екенін атап өтті.
Оның сөзінше, тиісті министрлік медиа мен онлайн-платформалардағы контентті тұрақты түрде бақылап, «Лотереялар және лотерея қызметі туралы» заңның талаптарын бұзу фактілерін анықтайды.
«Заңсыз лоторея өткізгендерге 100-ден 2000 айлық есептік көрсеткішке дейінгі мөлшерде айыппұл салынып, заңсыз табыс тәркіленеді», — дейді ол.
2024 жылдың ақпан айынан бастап 113 адам әкімшілік жауапкершілікке тартылған. Оларға салынған айыппұлдың жалпы сомасы 50 млн теңгеден асқан.
Ал сарапшы салық органдары блогерлермен ғана шектелмей, интернет арқылы табыс табатындарды да тіркеуге алу қажеттігін көптен айтып жүр.
2025 жылғы 28 ақпанда Қазақстанда 12 блогер 1,4 млрд теңге сомасына қосымша кірісті өз бетінше мәлімдеп, 73,6 млн теңге сомасына салық төлегені хабарланды.
Демек қазірдің өзінде индустрия ретінде қалыптасып қалған блогерлер платформасының тетіктерін зерделеген сайын төленбей қалған млрдтар турады көп есітетін боламыз.
