Қазақстанда әлеуметтік маңызы бар азық-түлік өнімдерін сатып алуға, тұрғын үйді жеңілдікпен жалдауға және коммуналдық қызметтерді төлеуге арналған ваучерлер әлеуметтік әмиянға қосылады.
Жасанды интеллект және цифрлық даму саласы бойынша бірінші вице-министр Ростислав Коняшкиннің айтуынша, жоба мына салаларды қамтиды:
- медициналық қызметтер;
- балабақшалар;
- үйірмелер мен секциялар;
- тұрғын үйді жеңілдікпен жалдау;
- тұрғын үй-коммуналдық қызметтерге берілетін жеңілдіктер;
- әлеуметтік маңызы бар азық-түлік пен тауарлар.
«Ваучер беру кезінде азаматтардың қолдау шараларына сай келу-келмеуі міндетті түрде тексеріледі. Әр адамға жеке ваучер тағайындалып, қызметтің нақты көрсетілгені eGov mobile қосымшасы немесе биометрия арқылы тіркеледі. Қызмет көрсетілген соң ғана төлемге арналған құжаттар қалыптастырылады. Азаматтарға қандай қолдау шаралары берілгені туралы ақпарат жеткізіліп, олар көрсетілген қызметтің сапасын бағалай алады», – дейді Ростислав Коняшкин.
Үкіметте мұндай тәсіл процестерді цифрландыруға, тіркелімдерді алып тастауға және бюджет қаражатын мақсатсыз жұмсау тәуекелін төмендетуге мүмкіндік береді деп үміттеніп отыр.
Сондай-ақ мемлекеттік органдарға әлеуметтік көмектің тиімділігін бақылау мен бағалау үшін мемлекеттік қызметтер тізіліміне ұсынылатын қолдау шараларын енгізуді тапсыру ұсынылады.
