Алматыда бір мекенжайға жүз адамды тіркеу дәуірі аяқталуы мүмкін.
Қала мәслихаты тұрғын үйге тіркелуге қатысты жаңа норманы бекітті: енді бір адамға кемінде 15 шаршы метр жалпы алаң қарастырылуы тиіс. Жаңа тәртіп мектеп пен емханаға түсетін жүктемені есептеуді реттеу үшін енгізілмек.
Не өзгереді?
Алматы мәслихатының сессиясында тиісті жобаны қалалық Жұмыспен қамту және әлеуметтік бағдарламалар басқармасының басшысы Бауыржан Жаубасов таныстырды.
Депутаттар жобаны қолдады
Қала әкімдігінің хабарлауынша, жаңа тәртіп бір мекенжайға тым көп адамның тіркелу жағдайларын шектеу және тұрғындардың нақты санын дәлірек анықтау үшін енгізіліп отыр.
Енді тіркеу кезінде тұрғын үйдің ауданы ескеріледі. Мысалы, ауданы 45 шаршы метр пәтерге 3 адамнан артық бөтен адамды тіркей алмайсыз. 60 шаршы метр болса – 4 адам.
Маңызды жайт
15 шаршы метр деген – әр адамға осындай көлемде жеке баспана берілуі керек дегенді білдірмейді. Бұл – тіркеу кезінде ғана қолданылатын есептік көрсеткіш.Кімге жүрмейді?Бұл шектеу тұрғын үй иесінің отбасы мүшелері мен жақын туыстарына қолданылмайды. Белгіленген нормадан асса да, үй иесі өз жұбайын, балаларын және олардың отбасы мүшелерін, жақын туыстарын, сондай-ақ асырауындағы, қамқорлығындағы немесе қорғаншылықтағы адамдарды шектеусіз тіркей алады.Яғни, егер сіздің пәтеріңіз 30 шаршы метр болса да, өзіңіздің 4 балаңызды, жұбайыңызды, ата-анаңызды тіркей аласыз. Шектеу – бір пәтерге 20-30 бөтен адамды ақшаға тіркейтін «резеңке пәтерлерге» қарсы бағытталған.
Неге енгізілді?
Бауыржан Жаубасовтың айтуынша:»Жаңа норма тіркеу есебін реттеп, әр ауданда іс жүзінде қанша адам тұратынын дәлірек анықтауға мүмкіндік береді. Бұл мектептер мен емханаларға түсетін жүктемені, коммуналдық және басқа да қалалық инфрақұрылымның қажеттілігін жоспарлау үшін маңызды».Қазір бір мекенжайда 50-100 адам тіркеліп тұр, бірақ іс жүзінде олар ол жерде тұрмайды. Ал статистика бойынша ол ауданда халық аз болып көрінеді. Салдарынан мектеп жетіспейді, емханада кезек көп, автобус жетпейді
Астанада қалай?
Еске салайық, 5 қыркүйектен бастап Астанада да осындай жаңартылған ережелер күшіне енді. Елордада талап сәл қатаң – әр адамға кемінде 15 шаршы метр пайдалы алаң тиесілі болуы керек. Алматыда – жалпы алаң есептеледі. Пайдалы алаң – балкон, дәлізсіз, тек бөлмелердің ауданы. Жалпы алаң – бәрі қосылған.Осылайша, екі мегаполис бір күнде «резеңке пәтерлермен» күресті бастады.
