Бір айға жуық алаңнан шет қалған Қазақстан құрамасының вингері Дастан Сатпаев қайта сапқа тұрды.
Ағылшындық «Бёрнли» сапындағы жас жұлдыз командамен бірге жаттығуын бастады.Қуанышты жаңалықты футболшының өзі жеткізді. Ол Instagram-да «Бёрнли» формасымен алаңда түскен суреттерін жариялады. Жанкүйерлер «қайта оралды» деген жазбаны жылы қабылдады.
Жарақат қай кезде болды?
Сатпаев жарақатын Чемпионшиптегі «Мидлсброға» қарсы өткен тартысты матчта алған еді. Ол ойында 80 минуттан астам уақыт алаңда жүріп, кездесудің үздік ойыншыларының бірі атанды. Алайда матч соңына қарай ауырсыну күшейіп, алаңнан кетуге мәжбүр болды. Дәрігерлер тексерген соң, бірнеше апта демалыс қажет екені белгілі болды. Сөйтіп, Дастан маңызды ойындарды өткізіп алды.
Қалай емделді
Қалпына келу кезеңі қос клубтың бақылауында өтті. Дастанды «Бёрнлидің» медициналық штабымен қатар, Лондонның «Челси» мамандары да қарады.
Бұл – кездейсоқ емес
Екі клуб та қазақстандық таланттың болашағына үлкен үміт артып отыр.Ем сәтті өтіп, дәрігерлер толық жаттығуға рұқсат берді. Қазір Сатпаев жалпы топпен жаттығып жүр, қосымша жеке бағдарламамен бабын жинап жатыр.Бапкер не дейді«Бёрнлидің» бас бапкері Ники Хайен де жақсы жаңалықты растады.
«Дастан – біз үшін өте маңызды ойыншы. Оның қайта оралғанына қуаныштымыз. Қазір бабына еніп келеді. Жақын арада алаңнан көресіздер», – деді ол.
Егер бәрі жоспар бойынша болса, Сатпаев алдағы турларда Чемпионшипте қайта ойнауы мүмкін. Бұл – ұлттық құрама үшін де жағымды жаңалық. Алда Қазақстан үшін шешуші матчтар тұр, ал Дастан – бас бапкердің басты үмітінің бірі.
