Қазақстан Еуразиялық тұрақтандыру және даму қорынан (ЕТДҚ) дағдарысқа қарсы көмекке мұқтаж емес екенін айтты. Сол күні сол қордан денсаулық сақтау саласындағы зерттеулерге қайтарымсыз қаржы сұрады. Сомасы да, тақырыбы да аталмады. Осы қайшылықта – бүкіл жаңалықтың мәні жатыр.
Вице-министр не деді?
Астанада өткен ЕТДҚ-ның халықаралық экономикалық жиынында Қаржы вице-министрі Даурен Кенбеил Қазақстан қордың үлес иесі ретінде даму жобаларына қаржы сұрай алатынын айтты. Бірақ тұрақтандыру көмегіне әзірге қажеттілік туындамаған.
«Бұл қор – тұрақтандыру және даму қоры. Тұрақтандыру – бұл белгілі бір дағдарыстық жағдайлар болған кездегі шара. Біздің елде осы қорға мәжбүрлі түрде жүгінуге тура келетіндей жағдай әлі болған жоқ», – деді вице-министр.
Оның айтуынша, тұрақтандыру қаржысына Тәжікстан, Қырғызстан, Армения және Беларусь жүгінген. Қазақстан мен Ресей әзірге мұндай тетікке жүгінбеген.
Ал қайтарымсыз қаржы ше?
Вице-министр денсаулық сақтау саласындағы сұранысқа жеке тоқталды. Қазақстан осы саладағы зерттеулер жүргізуге қаражат бөлуді сұраған. Шешім әлі қабылданбаған.Сомасы да, зерттеу тақырыбы да айтылмады.
ЕТДҚ сайты не дейді?
Қордың сайтында әлеуметтік жобаларды, соның ішінде денсаулық сақтауды қаржыландыру туралы бөлім бар. Бірақ қайтарымсыз қаржы алғандар ретінде ол жерде Армения, Қырғызстан және Тәжікстан аталған. Қазақстан бұл тізімде әзірге жоқ.
Түйін: ақша емес, адал жауап керек. Қайшылық мынада: Қазақстан көмек сұрайтын ел болып көрінгісі келмейді. Сондықтан бұл «тұрақтандыру» емес, «зерттеуге арналған қайтарымсыз қаржы» деп аталады.Бірақ егер зерттеулер адал болса – бұл кез келген тұрақтандыру көмегінен пайдалы болады. Өйткені біздің медицинаның проблемасы ақшаның жетіспеушілігінде емес, ақшаның қай жерде жоғалып жатқанын білмеуімізде.
