21 шілдеде Қазақстанның энергетика министрі Ерлан Ақкенженов Грузияның экономика және тұрақты даму министрі Мариам Квривишвилимен кездесті.Министрліктің баспасөз қызметі хабарлағандай, «Ақкенженов Квривишвили ханымды жақында тағайындалуымен құттықтап, оның басшылығымен елдер арасындағы экономикалық қарым-қатынастар жаңа серпін алатынына сенім білдірді».
Қазақстан Энергетика министрлігінің басшысы қазақстандық көмірсутектерді жеткізу бағыттарын әртараптандыру үшін грузиялық бағыттың стратегиялық маңыздылығын атап өтті. «Біз Грузияның көлік инфрақұрылымының сенімділігі мен тұрақтылығын жоғары бағалаймыз. 2024 жылы Баку — Тбилиси — Джейхан мұнай құбыры арқылы 1,4 млн тонна қазақстандық мұнай тасымалданды, ал биыл біз бұл көлемді 1,5 млн тоннаға дейін арттыруды жоспарлап отырмыз «, — деп хабарлады Энергетика министрлігінің басшысы.
Тараптар Грузиядағы қазақстандық активтердің, атап айтқанда Батуми теңіз порты мен Батуми мұнай терминалының ағымдағы қызметі мен даму перспективаларын талқылады, олардың өңірлік логистика үшін маңыздылығын атап өтті.
Жасыл энергетика саласында Ақкенженов пен Квривишвили екі ірі бастаманы: Қазақстан Әзірбайжан және Өзбекстанмен бірлесіп іске асырып жатқан транскаспий энергетикалық дәлізін құру жөніндегі жобаны және Қара теңіз арқылы жоғары вольтты кабель тарту жөніндегі грузиялық жобаны синергиялаудың мүмкіндіктерін қарастырды. Орталық Азияны Еуропамен байланыстыратын бірыңғай энергетикалық артерияны қалыптастыруға ортақ мүдделілік атап өтілді.
KazService мұнай сервистік компаниялар одағы Төралқасының төрағасы Рашид Жақсылықовтың пікірінше, экономикалық және сыртқы факторлар Қазақстанда мұнай өндіруді ұлғайту қажеттілігіне әсер етпейді. Оның айтуынша, бұл шешім тек қана Қазақстанның мүддесі үшін. Мұнай өндіру біз үшін, ең алдымен, елдің экономикалық өсімі мен дамуын қамтамасыз ету үшін қажет.
Мұнайды жеткізу бағыттары мәселелеріне қатысты сарапшы балама жолдарды іздестіруге қарамастан, Қазақстан үшін ең тиімді және сенімді бағыт — Каспий құбыр консорциумы (КҚК) екеніне назар аударды.
«Біз ұсына алатын немесе іске асыра алатын бірде-бір бағыт КҚК-дан тиімді болмайды. Әрине, бізді сыртқы фактор — КҚК жабылуы талқылана бастаған Ресей тарапынан төнген қауіп итермелейді. Бірақ әрбір құбырдың өзінің нақты қуаты бар. Мысалы, Каспий құбыры жылына 80 миллион тоннаға дейін мұнай өткізе алады, тіпті онда ештеңе болмаса да, біз мұнай жеткізуді жалғастырамыз — деп атап өтті Р.Жақсылықов.
Жақсылықовтың айтуынша, Баку-Тбилиси-Жейхан арқылы өтетін жаңа бағыт белгілі бір экономикалық тәуекелмен байланысты. Алайда, осы тәуекелдерге қарамастан, бұл бағыт мұнай бағасы өскен жағдайда тиімді болып қала береді.
«Егер мұнай барреліне 40 доллардан төмен болса, онда Баку арқылы жеткізу экономикалық тұрғыдан орынсыз болады. Бірақ мұнай бағасы 70-80 доллар болса, онда Баку арқылы жеткізу Қазақстан үшін тиімді болады. Түптеп келгенде барлығы нарықтағы баға қысымына байланысты, — деп түсіндірді Р.Жақсылықов.
Ол сондай-ақ Баку арқылы жеткізудің жоғары құнын ескерсек те, Қазақстанда экономикалық пайда әкелетін маржа болатынын атап өтті.
«Біз 90 миллион тонна мұнай өндіргенде Қазақстан экономикасы айтарлықтай жақсарды. Облыс орталықтары қалпына келтіріліп, біз экономиканы белсенді түрде әртараптандыра бастадық. Мұнай кірістері жастарға арналған білім беру бағдарламаларын қолдауға, қаржы институттарын ашуға және жаңа экономикалық жобаларды іске асыруға көмектеседі», — деп атап өтті сарапшы.
