Алматы әкімдігінің баспасөз қызметінің хабарлауынша, биыл 9 мамыр қарсаңында Ұлы Отан соғысының 15 ардагері 5 млн теңге көлемінде бір реттік төлем алды.
Сонымен қатар, ҰОС қатысушылары мен мүгедектеріне материалдық көмек көрсетілді. Мәселен, 1969 жылғы наурызда Даманский аралы ауданында және 1969 жылғы тамызда Жалаңашкөл көлінде ұрыс қимылдарына қатысқан 17 адамға 200 мың теңге төленді.
ҰОС ардагерлеріне теңестірілген 1 353 адам, басқа мемлекеттердің аумағындағы жауынгерлік іс-қимылдардың 2 955 ардагері, сондай-ақ соғыс жылдарындағы ерен еңбегі үшін ордендер мен медальдармен марапатталған 4 713 тыл еңбеккері 100 мың теңгеден алды.
Төлемдер Алматы қалалық мәслихатының шешімімен бекітілген азаматтардың жекелеген санаттарына әлеуметтік көмек көрсету ережелеріне сәйкес жүргізілді. Материалдық көмек Алматы қаласы бойынша «Азаматтарға арналған үкімет» мемлекеттік корпорациясының тізімі негізінде өтінішсіз жүргізілді.
Айта кетейік, Астанада Жеңіс күніне орай 3 398 адам 64 мыңнан 5 млн теңгеге дейін бір реттік төлем алды.
