Біз Иран тақырыбын талқылап жүргенде, Қазақстанның сыртқы резервтер жүйесінде үлкен жаңалықтар болып жатыр. Соңғы 5-6 жылда тұңғыш рет жылдың басында Ұлттық Қорға түскен түсім одан бюджет қажеттілігі үшін алынатын сомадан артық болып шықты.
Нәтижесінде дәл қазір Ұлттық қорда 39,88 триллион теңгені қордалап отырмыз. Бұл бүгінгі курспен 79,99 миллиард доллар. Бір сөзбен айтқанда, наурыз айының соңына таман Ұлттық қор өз тарихында тұңғыш рет 80 миллиард доллардан асатын болады.
Сарапшы Айбар Олжаевтың айтуынша, жыл басындағы екі айда Ұлттық қорға 701,4 миллиард теңге түскен. Ал сол уақытта Қордан 460,28 млрд теңгені құрады. Сонда Қордың қаржылық қоржыны 241 миллиард теңгеге көбейгенін көреміз. Мұнай компаниялары төлеген корпоративті табыс салығы 244 млрд теңгеге шықты. Оған қоса, пайдалы қазбаларды өндіруге салынатын салық 166,6 млрд теңге, СРП бойынша Қазақстанның үлесі 228,8 млрд теңге, экспортқа салынатын ренталық салық 61 млрд теңгені құраған.
«Былтыр Ұлттық қорға бір жылдың ішінде 10 триллион теңге, яғни қазіргі курспен 20 миллиард доллар келген болатын. Оның 7,5 миллиард долларын мұнай алып келді. Биылғы бағаларға және өндіру көлеміне қарап, осы жылы мұнайдан 8,4 миллиард доллар келеді деп болжай аламын. Ал инвестициялық табыс былтыр 12,5 миллиард доллар көрсетті. Биыл ол кемінде 13 миллиард доллар болуы мүмкін.
Сонда биыл Ұлттық қор 21,4 миллиард долларға толығуы тиіс. Бекітілген бюджет бойынша биыл қордан алынатын трансферт сомасы 2,77 триллион теңгемен шектелді. Бұл — қазіргі бағаммен 5,5 миллиард доллар. Демек, биылғы қаржылық жылдың қорытындысы бойынша Ұлттық қор балансында +16 миллиард доллар қалатын болса, біз 2027 жылдың басында 96 миллиард доллар көрсетеміз. Ал келесі жылдың жартысында 100 миллиард доллардан асамыз да, көптен бері қол жеткізе алмай жүрген асыл арманымыз орындалады», — дейді Айбар Олжаев.
