Ұлттық қордағы қаржы Үкіметтің де, Ұлттық банктің де түн ұйқысын төртке бөлетінін, қор қаржысы үкімет үшін «копилкаға айналғанын» осыған дейін жазғанбыз. Ұлттық банкте Ұлттық қордан тағы қайда инвестиция салуға болатынын ойлай бастады. Бүгін Ұлттық Банкі «Қазақстан Республикасы Ұлттық қорының инвестициялық операцияларын жүзеге асыру ережесін бекіту туралы» Қазақстан Республикасы Ұлттық Банкі басқармасының 2006 жылғы 25 шілдедегі № 65 қаулысына өзгеріс енгізу туралы «қаулы жобасын әзірлеу туралы хабарлады.
Құжатқа сәйкес, жоба Ұлттық қордың қаражатын дамыған елдердің мемлекеттік облигациялар портфелі шеңберінде инфляциялық индекстелген мемлекеттік бағалы қағаздарға инвестициялау мүмкіндігін көздейді. Монетарлық реттеуші бұл қор активтерін басқарудың тиімділігін арттыруға мүмкіндік береді деп есептейді. Бұл үшін дамыған елдердің мемлекеттік инфляциялық-индекстелген облигацияларын қамтитын және облигациялардың осындай түрі үшін неғұрлым қолайлы болып табылатын ICE BofA Global Inflation-Linked Government Index тиісті кең индексі таңдалды. Ұлттық банкте түсіндіргендей, инфляциялық индекстелген мемлекеттік бағалы қағаздар — бұл номиналды құны тұтыну бағасының өсуіне байланысты өзгеретін мемлекеттік облигациялар.
«Ал купондық төлемдер осы түзетілген құнға қарай есептеледі. Кірістілігі тіркелген мемлекеттік бағалы қағаздардан айырмашылығы, мұндай облигациялар инвестициялардың сатып алу қабілетін және нақты көріністегі кірісті сақтауды қамтамасыз етеді. Дефляция кезінде, әдетте, бұл қағаздардың номиналды құны белгіленген шектен төмен түспейді, бұл бастапқы инвестициялардың сақталуына кепілдік береді» деп түсіндірді Ұлттық банк.
Құжат Ұлттық қор активтерін басқарудың тиімділігін арттыруға және инвестициялау құралдарын әртараптандыруды жақсартуға бағытталған. «Осылайша, ұсынылып отырған өзгеріс тұрақтылықты арттыруға және ұзақ мерзімді перспективада Ұлттық қордың кірістілігін қамтамасыз етуге мүмкіндік береді», — деп қорытындылады ҰБ.
