Топтық жетістік: KAZ Minerals-тың екі компаниясы Қазақстанның үздік жұмыс берушілерінің қатарына енді. Астанада Paryz Bridge үздік жұмыс берушілер рейтингі бойынша марапаттау рәсімі өтті. Беделді «Тау-кен өндірісі және шикізат салалары» номинациясында KAZ Minerals-тың бірден екі компаниясы лауреат атанды, деп хабарлайды Bizmedia.kz тілшісі.
Атап айтқанда, KAZ Minerals Aktogay бірінші орынды алса, ал KAZ Minerals Bozshakol екінші орынды иеленді. Paryz Bridge рейтингі — Қазақстандағы HR және корпоративтік тұрақтылық саласындағы ең ауқымды зерттеулердің бірі.
Компаниямыздың осындай марапатқа ие болғанын мақтан тұтамын. Біз көптеген жылдар бойы HR-процестерімізді жетілдіру және жеңілдету бағытында жұмыс істеп келеміз. Бұл үшін түрлі технологияларды қолданып, сонымен қатар қызметкерлеріміздің физикалық және психологиялық қауіпсіздігіне ерекше көңіл бөлеміз. Кеніштің шалғайда орналасқанына қарамастан, адамдардың бізде жұмыс істеуге ынталы болуы үшін компанияда қолайлы еңбек жағдайлары жасалған, — деді марапаттау рәсімінде KAZ Minerals Aktogay директоры Рейнхард Вильюн.
KAZ Minerals Bozshakol директоры Джонатан Раоның айтуынша, компания бұл жетістікке өз қызметкерлерінің арқасында қол жеткізген.
Бұл марапатқа ие болу — біз үшін үлкен мәртебе. Ең алдымен, бұл — біздің қызметкерлеріміздің еңбегінің жемісі. Қызметкерлерді жұмыспен қамтамасыз етіп қана қоймай, олардың кәсіби дамуына және мансаптық өсуіне мүмкіндік беру маңызды деп санаймын. Біз оларға әрдайым қолдау көрсетеміз. Компанияда жаңа қызметкерлерге арналған арнайы бейімдеу бағдарламасы, сондай-ақ кадрлық резервті дамыту бағдарламасы жұмыс істейді. Адамдар — компаниямыздың ең басты құндылығы әрі табысымыздың негізгі факторы, — деді Джонатан Рао.
Айта кету керек, мұндай нәтиже кездейсоқ емес. Компанияда адами ресурстарды дамытуға ерекше көңіл бөлінеді. Еңбек қатынастары бөлімінің басшысы Бауыржан Әбілқасымұлының айтуынша, KAZ Minerals Тобы болашақ мамандарды даярлаудың кешенді жүйесін жүзеге асырады. Бұл жүйе кәсіптік бағдар беруден және өндірістік тәжірибеден бастап, жұмысқа орналастыруды, кәсіби дамуды және қызметкерлердің жетістіктерін мойындауды қамтиды.
Осы уақытқа дейін компанияда Қазақстан мен жақын шетелдердің 25-тен астам жоғары оқу орны мен колледжінен келген 1 477 студент өндірістік тәжірибеден өтті. Олардың қатарында Satbayev University, Назарбаев Университеті, ҚБТУ, Ә. Сағынов атындағы Қарағанды техникалық университеті, Д. Серікбаев атындағы Шығыс Қазақстан техникалық университеті, сондай-ақ Аягөз, Семей, Өскемен және өзге өңірлердің жетекші колледждері бар.
KAZ Minerals мамандары жыл сайын 15–20 рет мектептерге, колледждерге және жоғары оқу орындарына барып, жастарды тау-кен металлургиясы саласындағы заманауи мамандықтармен таныстырады. Осылайша, жастар ерте кезеңнен бастап, осы саладағы кәсіптер туралы жан-жақты ақпарат алады.
Компанияның өндірістік алаңдарына студенттер ғана емес, оқытушылар да барып тұрады. Бүгінге дейін KAZ Minerals-тың заманауи технологияларымен 70-тен астам педагог танысты.
Жұмыс мұнымен аяқталмайды. 2018 жылдан бері жүзеге асырылып келе жатқан «Тағылымгер» бағдарламасы аясында KAZ Minerals тобының өндірістік алаңдарында 1 041 адам ақылы тағылымдамадан өтті. Соның 759-ы тұрақты жұмысқа қабылданды. Қазіргі уақытта Ақтоғай мен Бозшакөл өндірістік алаңдарында 79 тағылымгер білім алуды жалғастырып жатыр. Онда жас мамандар тәлімгерлердің жетекшілігімен заманауи жабдықтарда тәжірибе жинақтап, жеке даму жоспарлары бойынша білім алады, — деді Бауыржан Әбілқасымұлы.
Жалпы алғанда, білім беру ұйымдарын әлеуметтік қолдауға бағытталған қаражат көлемі 964,3 млн теңгені құрады.
Компанияның негізгі бастамаларының бірі — «Супер-колледж» жобасы. Оны іске асыруға 520 млн теңгеден астам қаржы бөлінді. Жоба колледждердің материалдық-техникалық негізін жаңғыртуды, техникалық мамандықтарды дамытуды және заманауи білім беру инфрақұрылымын қалыптастыруды көздейді.
