Неміске керек 34 сирек металдың 21-і бізде жатыр. Бұрын соны кен күйінде сатып келдік.
Енді Тоқаев жаңа канцлерге: «Енді кенді емес, кеннен шығатын өнімді бірге жасайық» деп отыр.
Бұл сапардың сәні де, салмағы да бөлек
Өйткені Берлинде өзгеріс бар. Тоқаев жаңа канцлер Фридрих Мерцпен алғаш рет ресми жүздесті. Танысу емес, есеп қиылыстырған әңгіме. Ақорда таратқан цифр – құрғақ есеп емес, қоржындағы бар дерек. Былтыр өзара сауда 13 пайызға өсіп, 4 жарым миллиард долларға жеткен. Жиырма бір жылда неміс инвестициясы 8 миллиард доллар болып елге кірген. Ал қазір қолда 54 миллиард долларлық 40 жобаның тізімі тұр. Бірақ бұл әлі қағаздағы сан. Соның қаншасы зауыт болып түтін түтетеді – сол Берлинде шешіледі.
Тоқаев бұл жолы мінберден емес, газеттен сөйледі
Германияның ең беделді басылымы Handelsblatt-қа арнайы мақала жазды. Өзегі – бір ауыз сөз. Біз енді кен сатушы ел болғымыз келмейді. Еуропаға қажет 34 сирек металдың 21-і Қазақстан жерінде жатыр. Бұрын соны кен күйінде сатып, дайын затын еселеп қымбатқа алатынбыз. Енді Тоқаев соны тоқтатайық дейді, келіңдер, кенді даладан тасымай, осында отырып бірге өңдейік, бірге батарея жасайық, бірге машина құрастырайық дейді.
Неге дәл қазір?
Еуропа Ресейден кейін сенімді серік іздеп, жан-жағына қарап жүр. Шикізаттың қауіпсіз көзі керек. Қазақстан сол кезде таптырмас балама.
Екінші себеп – келесі жылы екі ел достығына 35 жыл толады.
Тоқаев жаңа канцлерді келесі жылы Астанаға мемлекеттік сапармен шақырды. Мемлекеттік сапар деген – жай шай ішіп кету емес, үлкен уағдаға қол қою деген сөз.
Осы арада Президент жүрекке жақын тұсты да ұмытпады
Қазақстанда 200 мың неміс тұрады, Германияда бізден барған 1 миллион адам бар деді. Бұл сан емес, тамырымыз аралас, біз бөтен емеспіз дегені.Сөйтіп қарасаң, Берлин сапары – қанша тонна саттық деген есеп емес, қанша зауыт саламыз деген сауал.
