Қазақстанда исламдық ипотеканы заңдастыратын норма парламент қарастырып жатқан «Банктер және банк қызметі туралы» заң жобасына енгізілмей қалғаны өткен аптада белгілі болды.
- Оның алдында 2024 жылдың желтоқсанында «Отбасы банк», Қазақстан құрылысшылар одағы және Исламдық қаржы мен бизнес қауымдастығы исламдық қаржы индустриясын дамыту жөнінде меморандумға қол қойған болатын.
- Сол кезде 2025 жылы исламдық ипотека іске қосылады деп жоспарланған еді.
- Банк тұрғын үй құрылыс жинақ жүйесі арқылы исламдық қағидаларға сай баспана алудың жолдарын қарастыруды көздеген.
Мәжіліс жанындағы қоғамдық палата отырысында банк Отбасы банк басқармасының төрайымы Ләззат Ибрагимова «Банктер және банк қызметі туралы» заң жобасына тұрғын үй құрылыс жинақтары жүйесі шеңберінде исламдық ипотеканы ұсынуға мүмкіндік беретін норманы қайтару қажеттігін айтты.
Оның айтуынша, тұрғын үй несиелендіру саласында исламдық өнімдерге сұраныс өсіп келеді және Отбасы банкі тиісті желіні 2026 жылы іске асырғысы келеді.
«Соңғы екі аптада әлеуметтік желілерде жас қыздар мен әйелдер Отбасы банкін [исламдық ипотека туралы] сұрап отырған челлендж жүріп жатыр. Біз 2026 жылы ислам ипотекасын іске асыруды бастаймыз деп бірнеше рет уәде бердік. Бұл өте үлкен сұраныс. Халық, әсіресе жастар, діни қағидаттарды ұстанады» — деп атап өтті Ибрагимова.
Ол тиісті норма заң жобасының бастапқы редакциясына енгізілгенін, бірақ кейін Мәжілісте қаралған кезде жоғалып кеткенін түсіндірді.
«Біз қазір Сенатқа жүгінуді жоспарлап отырмыз», — деп атап өтті Ибрагимова.
Бұрын хабарланғандай, парламент «Қазақстан Республикасындағы банктер және банк қызметі туралы» заң жобасын және қаржылық реттеуді реформалауға бағытталған ілеспе түзетулерді қарауда.
Оның ішінде құжат әмбебап және базалық банктік лицензияларды, сондай-ақ исламдық банктік операцияларға лицензияларды енгізуді көздейді.
Заң банк секторының ашықтығын арттыруы, клиенттерді қорғауды күшейтуі, реттеу жүйесін жаңғыртуы және ислам банкингі мен цифрлық қаржыны дамыту үшін жағдай жасауы тиіс деп болжануда.
