Қазақстан Республикасының Конституциялық Соты Президенттің 2026 жылғы Конституцияның бірқатар баптарын ресми түсіндіру туралы өтінішін қарап, тиісті қаулы қабылдады, деп хабарлайды Bizmedia.kz.
Соттың түсіндіруінше, 2026 жылғы Конституцияда белгіленген шектеулер тек осы Конституция күшіне енгеннен кейін жүзеге асатын сайлау немесе тағайындау рәсімдеріне қолданылады. Сондықтан 1995 жылғы Конституция кезеңінде белгілі бір мемлекеттік лауазымдарды атқарған азаматтардың бұрынғы қызмет мерзімі немесе сол кездегі тағайындалуы жаңа шектеулерді есептеу кезінде ескерілмейді.
Осылайша, 1995 жылғы Конституцияға сәйкес қызмет атқарған адамдар 2026 жылғы Конституция күшіне енгеннен кейін заңда көрсетілген лауазымдарға қайта сайлана немесе тағайындала алады.
Конституциялық Соттың ресми түсіндіруіне сәйкес, мұндай жағдайда 2026 жылғы Конституция күшіне енгеннен кейінгі сайлау немесе тағайындау алғашқы рет сайлану немесе тағайындалу ретінде қарастырылады. Бұл ретте бұрынғы Конституция кезеңіндегі қызмет өтілі конституциялық шектеулерді қолдануға негіз болмайды.
