ТОП-20-ға енген Қыздар университетінің студенттеріне берілетін тегін тамақ 2027 жылдан бастап алынып тасталуы мүмкін. Үкімет жобаны жариялады, бірақ сұрақ көп.
Үкімет бұл шешімге не үшін барып отыр?
Себеп – бюджетті үнемдеу.Құжаттың түсіндірме жазбасында солай жазылған: «бюджет қаражатын оңтайландыру және тегін ыстық тамаққа кететін шығыстарды кезең-кезеңмен тоқтату»
Ulysmedia-ның жазуынша, бұл бастама Премьер-министр бекіткен жол картасынан шыққан. Ол жол картасы – бюджеттік бағдарламаларды тексеру қорытындысы бойынша жасалған. Яғни, арнайы ешқандай идеология жоқ. Қаржы блогы барлық жеңілдікті тізіп шығып, қысқартуға болатынын қысқартып жатыр. Сол тізімге ҚызПУ-дың тамағы да іліккен.
Тегін тамақ беру туралы шешім қашан қабылданған еді?
Бұл – жаңа жеңілдік емес, ондаған жылдан бері бар дәстүр.Университеттің өзі 1944 жылы Қазақ КСР Халық Комиссарлары Кеңесінің №457 қаулысымен «қазақ жастарынан, қыздардан мұғалім даярлау» үшін ашылған. Сол кезден бері грантта оқитын қыздарды жатақхана, шәкіртақы, тамақпен толық қамту – әлеуметтік қолдаудың бір бөлігі болған. Заңдық тұрғыда ол Үкіметтің студенттерді тегін тамақтандыру қағидаларында бекітілген. Қазіргі алып тастау туралы жоба – сол бұрыннан бар норманы 2027-2028 оқу жылынан бастап түскендер үшін тоқтату. Үкімет осы арқылы қанша ақша үнемдемек? Ресми сома әлі жарияланған жоқ.
Ашық НҚА-дағы жобада да, Власть басылымы таратқан қысқаша мазмұнда да нақты қаржылық есеп жоқ. Тек «шығындарды оңтайландыру» деген жалпы сөз бар.
Талқылау 3 қарашаға дейін жүреді
Әдетте қаржылық есептеме сол талқылаудан кейін жарияланады. Болжалды есеп: қазір университетте шамамен 6-7 мың грант иегері оқиды. Олардың әрқайсысына күніне берілетін тамақ шығынын есептесе, жылына жүздеген миллион теңге болады. Бірақ бұл – ресми емес, шамамен алынған есеп.
Түйін:
Шешім әлі қабылданған жоқ – бұл тек жоба. Егер қабылданса, 2027 жылы түскен талапкерлерден бастап тегін тамақ болмайды, бұрын түскендерге тиіспейді
