Үкімет екі ай ішінде газ бағасын қалыптастырудың жаңа моделін әзірлеуді тапсырды.
Еске салайық, бұған дейін Қазақстанда 2026 жылғы 1 шілдеден бастап тауарлық газдың көтерме бағасын орта есеппен 33%-ға арттыру жоспарланып отырғаны хабарланған еді. Сонымен қатар энергетика министрлігі халық үшін тарифтердің өсуі тежелетінін және бағаның күрт қымбаттауы күтілмейтінін мәлімдеген болатын.
Премьер-Министр Олжас Бектенов екі ай ішінде газ саласындағы жаңа тарифтік саясат бойынша ұсыныстар әзірлеуді ұсынды. Сонымен қатар үкімет өндірістерді газға қосу ережелерін қатаңдатады және отандық жабдықтарға арқа сүйейді:
«Газ саласындағы баға белгілеудің қолданыстағы моделі оның дамуын тежемеуі тиіс. Ұлттық экономика министрлігіне Энергетика министрлігімен және Бәсекелестікті қорғау агенттігімен бірлесіп, халықты әділ атаулы қолдауды сақтауды ескере отырып, жаңа ынталандырушы тарифтік саясат бойынша ұсыныстар енгізуді тапсырамын», — деп мәлімдеді Бектенов.
Премьер сондай-ақ энергия сыйымды және тиімділігі төмен өндірістерге газ таратуды тоқтатуды талап етті. Энергетика министрлігі мен әкімдіктерге газға қосылғысы келетін жаңа кәсіпорындар үшін энергия тиімділігі критерийлерін әзірлеуге бір ай уақыт берілді.
«Тұрақты өсіп келе жатқан тұтыну жағдайында қолжетімді газ көлемі бірінші кезекте халықтың қажеттілігіне және жоғары технологиялық өндірістерді дамытуға бағытталуы тиіс», — деп баса айтты Үкімет басшысы.
Бұдан өзге, Бектенов бір ай ішінде тек қазақстандық өндірушілерден сатып алынатын мұнай-газ жабдықтарының тізбесін бекітуді тапсырды. Мемлекет газ саласындағы инфрақұрылымдық жобаларға едәуір қаражат салады және отандық өндірушілер кепілдендірілген тапсырыс алуы тиіс, деп түсіндірді премьер.
Бұған дейін біз вице-премьер Серік Жұманғарин газдың көтерме бағасының көтерілуі сөзсіз екенін ескертіп отырғанын жазғанбыз. Оның айтуынша, қазіргі баға жағдайында жеке бизнес кен орындарын игеруге бармайды, себебі бұл тиімсіз.
«Немесе газ басқа себептермен қымбаттайды, себебі біз оны импорттаймыз. Ал бізге газ сататын елдер біздің әлеуметтік саясатымызды ескермейді», — деп мәлімдеді Жұманғарин.
