Үкіметте 2035 жылға қарай жалпы қуаттылығы 26 ГВт энергетикалық нысандарды іске қосудың мүмкіндіктері талқыланды.
Энергетика министрлігінің мәліметінше, қазіргі уақытта Қазақстанда 230 электр станциясы жұмыс істейді, оның ішінде жалпы белгіленген қуаты 3 ГВт-тан асатын жаңартылатын энергия көздерінің (ЖЭК) 156 нысаны. 2024 жылдың қорытындысы бойынша электр энергиясын өндіру 119,9 млрд кВт· сағ тұтыну кезінде 117,9 млрд кВт· сағ құрады.
Қуаттардың тапшылығын жабу және жаңарту үшін 2035 жылға дейін қосымша 26 ГВт энергия енгізе отырып, генерацияны дамытудың кешенді бағдарламасы іске асырылуда. Бүгінде 10 ГВт-ты іске қосу бойынша жобалар әзірленуде. Жұмыс істеп тұрған станцияларды жаңғырту есебінен тағы 5 ГВт қамтамасыз ету жоспарлануда. 2025 жылы 621,5 МВт, оның ішінде 166 МВт дәстүрлі және 455,5 МВт ЖЭК қуатын іске қосу жоспарланған.
«Нөлге жақын шығарындылармен таза көмір технологиясына, атап айтқанда, қуаты шамамен 2,6 ГВт болатын Екібастұз ГРЭС-3 және Курчатов қаласында 600-700 МВт болатын ЖЭО салуға перспективалы жобаларды іске асыруға назар аударылды. Аталған бастамалар ескірген көмір станцияларын кезең-кезеңмен ауыстыруға бағытталған және мемлекет басшысы белгілеген бағамға, 2060 жылға қарай көміртегі бейтараптығына қол жеткізуге сәйкес келеді «, — делінген хабарламада.
Түркістан облысында 2027 жылға қарай қуаты 1 ГВт бу-газ қондырғысын тапсыру күтілуде. Нысанды TURAN арнайы экономикалық аймағының құрамына қосу жоспарланып отыр.
Екібастұз ГРЭС-2 кеңейту аясында қуаты 540 МВт болатын үшінші энергоблоктың құрылысы жүргізілуде, оны пайдалануға беру 2028 жылға жоспарланған.
Алматыда ТЭЦ-2 мен ТЭЦ-3 газға көшіру жоспарлануда, Жаңғырту аяқталғаннан кейін 2026 жылы бұл станциялардың белгіленген жиынтық қуаты 1 ГВт-тан асады.
Сондай-ақ, Көкшетау, Семей және Өскеменде жаңа ЖЭО құрылысына дайындық жүргізілуде. Көкшетауда жоба бойынша мердігерлер анықталды, келісімшарттар жасасу бойынша рәсімдер басталды.
