Бұл жолы да 30 жылдан бері айтылып келе жатқан сценарий тағы қайталанды. Вице-премьер – Ұлттық экономика министрі Серік Жұманғариннің төрағалығымен өткен әлеуметтік маңызы бар тауарлар бағасын тұрақтандыру және инфляцияны тежеу жөніндегі апта сайынғы кеңесте 2025-2026 жылдарға арналған тұрақтандыру қорларын толықтыру үшін жаңа өнім бойынша келісімшарт жасау барысы мен соңғы аптадағы баға динамикасы талқыланды.
Сауда және интеграция бірінші вице-министрі Айжан Бижанованың айтуынша, сиыр еті бәсекеге қабілетті: елдегі орташа баға бір кг үшін 3105 теңге, бұл ЕАЭО елдері мен Өзбекстанға қарағанда төмен.
Келесі маусымда картоп бағасын өсуін алдын алу үшін Сауда министрлігі Ауыл шаруашылығы министрлігімен, әкімдіктермен және картоп өсірушілер одағымен бірлесіп тұрақты жеткізілімдер мен бағалар туралы меморандум дайындап жатыр.
Ауыл шаруашылығы вице-министрі Ербол Тасжүрековтің мәліметінше, 22 тамыздағы ақпарат бойынша қырыққабат – 317,9 мың тонна, картоп – 512,9 мың тонна, пияз – 226,8 мың тонна, сәбіз 98,8 мың тонна жиналды.
Сонымен қатар, барлық өңір күзгі-қысқы және көктемгі кезеңдерде қолжетімді бағаларды қамтамасыз ету үшін тұрақтандыру қорларына күзгі көкөністерді келісімшарттауды аяқтаған жоқ.
Сондай-ақ, кеңесте тұрақтандыру қорларын бақылау үдерісін цифрландыру бойынша бастама көтерілді.
Әлеуметтік маңызы бар азық-түлік өнімдерінің түсуін және шығуын тіркеу үшін бейнемониторинг жүйелерімен әрі көкөніс қоймасының сканерлеуші құрылғыларымен жарақтандыру ұсынылады.
Бұл өнім қозғалысының ашықтығын және оны онлайн режимде бақылауды қамтамасыз етуге мүмкіндік береді.
Серік Жұманғарин бұл бастаманы қолдап, өңірлерге оны енгізу тетіктерін пысықтауды тапсырды.
Үкіметтің инфляцияны тежеу туралы ұсынысы уақытша ауырсынуды басатын инъекция
Бұған дейін Қазақстан Ұлттық банкінің басшысы Тимур Сүлейменов журналистермен әңгімелесу барысында инфляцияның өсуі туралы мәселеге түсінік берген болатын. «Біз инфляциямен ұзақ күресеміз. Сондықтан кешенді тәсіл болуы тиіс. Біз инфляцияға қарсы іс-қимыл жоспарын жасаудамыз. Бізде инфляцияны жеңеміз, инфляцияны еңсереміз деген сенім бар. Бірақ қазіргі кезде инфляцияға қарсы факторлардың саны көп. Олармен бүкіл әлеммен жұмыс істеу керек. Тек Ұлттық банк қана емес, үкімет пен басқа да мемлекеттік органдар де күресу керек», — деді Тимур Сүлейменов.
Сарапшылардың айтуынша, үкіметтің инфляцияны тежеу туралы ұсынысы уақытша ауырсынуды басатын инъекция. Ал бұрын енгізілген «Инвестиция орнына тариф» бағдарламасы оң нәтиже берген жоқ. ТКШ желілерін жаңартуға бағытталған қаражат іске қосылды. Нәтижесінде ел сол инфрақұрылымға қайтадан ақша жинап жатыр. Сарапшылардың айтуынша, геосаясат пен мұнай бағамы қызып жатқанда инфляция жыл соңына дейін 20% -ға дейін көтерілуі мүмкін.
Сарапшы Бейсенбек Зиябековтың айтуынша, үкіметтің инфляциямен күресі мысықтан келген қауіптен оның мойнына қоңырау байлап қойғысы келетін көп тышқанның тірлігіне көбірек үқсайды. Мәселе, сол қоңырауды мысақтың мойнына кім байлайды дегенге келгенде тығырыққа тірелген. Үкімет инфляцияны тежеуші фактор экономикалық ресурс екенін білсе де сол ресурсқа дем беретін күшті ішкі нарықтан таба алмай дағдарып тұр. Сарапшы инфляциялық мақсаттарды төмендетуді, орталық банктің тәуелсіздігін күшейтуді, бюджеттік ережелерді енгізуді, сондай-ақ есептік мөлшерлеме мен банк резервтері сияқты монетарлық құралдарға әсер етуді қоса алғанда, инфляциямен күресу үшін шаралар кешенін ұсынады.
