Соңғы жарты жылдықта тоқал тақырыбы парламентті де толқытып жібергенін көріп жүрміз. Мәжілісінің депутаты Олжас Құспеков заманауи қазақстандық әйелдің жаңа моделін қалыптастыру жөнінде бастама көтерді. Депутат бүгінгі қоғамда әйелге орынсыз пікірлер жиі таңылатынын атап өтті. «Кей жерлерде әйелге тоқал болу немесе біреудің отбасын бұзушы рөлін ұсыну сынды модельдер насихатталады. Бірақ басқа жол да бар – ол әйелдің ана, көшбасшы, даналық пен үйлесімділіктің иесі ретіндегі жолы», – деді ол.
Мұның алдында депутаттардың бірі «өз «тоқалына» депутаттық мандатын «беріп», некесіз баласын жасырды» деген сөз шыққан еді
Мәжіліс депутаты, заңгер Абзал Құспан журналист Е.Сейілханның YouTube арнасына сұхбатында Қазақстандағы екі әйел алу мәселесіне қатысты өз көзқарасын білдірді. Ол бұл мәселенің қоғамда орныққанын, бірақ реттелмейтін проблема санайды және мұны заңмен жүйелеуді ұсынды.
«Қараңыз, елімізде «де-юре», заң жүзінде тоқал алуға тыйым бар. Заңсыз саналады. Алайда ол үшін жаза, жауапкершілік қарастырылмаған. Тек тыйым ғана бар. Сондықтан «де-факто», яғни, іс жүзінде қоғамда бұл құбылыс кеңінен таралған. Біраз азаматтың екінші, үшінші, төртінші әйелдері бар екенін білеміз», – деді Құспан.
Мәжіліс депутаты Мұрат Әбенов әйелдерді тоқал болуға насихаттап жатқанына наразылық білдірді.
Оның айтуынша, конституцияда полигамды некеге тыйым салынуға тиіс.
«Неке қиылса, жауапкершілік болуы керек. Тоқалдыққа бару керек деп насихаттауға болмайды. Қазір қыздар ойланып, ойлары бұзылып, кейбіреулері тоқалдыққа дайын болып жүр. Мәселе, насихатта. Насихаттамау керек. Теледидардан ол туралы көрсетпеу қажет», – дейді депутат.
Мұрат Әбеновтің пікірінше, насихаттың кесірінен ер адамдар екінші және үшінші әйел алуға болады деп есептейді. Мұндай жағдай өмірде кездессе де, оны үгіттеуге жол бермеу керек.
«Өзбекстан мен Қырғызстанда бұған қылмыстық жауапкершілік енгізді. Екінші, үшінші әйел алуды насихаттауға 2023 жылы тыйым салды. Сол жылдан бері мемлекеттік неке тіркеуі болмаса, екінші, үшінші және төртінші неке үшін жауапкершілікке тартылады. Сондықтан Өзбекстан мен Қырғызстан алға кетті», – деді депутат.
Оның айтуынша, Қазақстан бұл екі мемлекетке қарағанда зайырлырақ. Бірақ бұған көз жұма қарап отырмыз. Мұның жазасы әр елде әртүрлі. Бір елде айыппұл салса, бір елде қоғамдық жұмыстарға тартылады.
