Сенатта өткен брифинг барысында Энергетика вице-министрі Санжар Жаркешовтің айтуынша, жанар-жағармай бағасы қазіргі уақытта нарықтық тетікпен қалыптасады және мемлекет тарапынан тікелей реттелмейді.
Вице-министрдің айтуынша елдің ішкі нарығында жанармай тапшылығы жоқ. Баға сұраныс пен ұсынысқа байланысты қалыптасады. Қазіргі нарықта бағада айтарлықтай өзгеріс те, тапшылық жоқ те жоқ. Қорда 600 мың тонна бензин және 600 мың тонна дизель отыны қоры бар», деді ол.
«Құзырлы органдар жағдайды тұрақты бақылауда ұстап отыр. Сондықтан бензин мен дизель бағасының негізсіз әрі күрт қымбаттауына жол берілмейді», деді Санжар Жаркешов.
Осыған дейін KAZENERGY қауымдастығы алаңында жанар-жағармай нарығындағы баға қалыптастырудың өзекті мәселелері мен алдағы қадамдарына арналған кездесу өткізген.
Талқылауға сарапшылар, салалық қауымдастықтар, нарықтың түрлі сегменттерінің өкілдері, «ҚазМұнайГаз» ҰК АҚ және мемлекеттік органдар қатысты.
Сарапшы Нұрлан Жұмағұловтың пікірінше, нарықтық факторларды елемеу және көрші елдермен баға айырмашылығының айтарлықтай болуы «сұр» экспортқа жағдай жасайды. Яғни арзан отын заңсыз түрде елден шығарылып, ішкі нарықта жасанды тапшылық қаупін тудырады. Бағаларды кезең-кезеңімен теңестіру бұл тәуекелдерді азайтып, ішкі нарықты тұрақты қамтамасыз етуге мүмкіндік береді.
Нарықтық жағдайларды дамыту мұнайды өңдеу тереңдігін арттыруға және инвестициялар тартуға қосымша ынталандыру береді. Бұл елдің энергетикалық қауіпсіздігін қамтамасыз етудің негізгі факторларының бірі саналады.
Осыған байланысты қатысушылар мораторий мерзімі аяқталғаннан кейін нарықтық баға қалыптастыруға көшу нарықтың тұрақтылығын арттырудың маңызды факторы болуы тиіс екенін атап өтті. Бұл бағаның ашық қалыптасуын, оның экономикалық негізділігін және ұзақ мерзімді тұрақтылығын қамтамасыз етеді.
