Қырғыз Президенті Садыр Жапаров Қазақстан Президенті Қасым-Жомарт Тоқаевқа көрнекті ақын, қоғам қайраткері Мұхтар Шахановтың дүниеден өтуіне байланысты көңіл айту жеделхатында бұл хабарды бүкіл түркі әлемі үшін ауыр шығын және «тұтас бір дәуірдің аяқталуы» деп бағалады. Садыр Жапаров өз жеделхатында Мұхтар Шахановтың тек қазақ халқының ғана емес, қырғыз жұртының да «асқар тауы» болғанын ерекше атап өтті.
«Қырғыз халқы да өз рухының тірегінен айырылып, қабырғасы қайысып отыр. Мұндай тұлғалардың өмірден өтуін біздің халықта «тұтас бір дәуір кетті» деп айтады», — делінген құжат мәтінінде.
Қырғыз Президенті ақынның Қазақстанның Қырғызстандағы тұңғыш елшісі ретіндегі еңбегін және әлемдік деңгейдегі жазушы Шыңғыс Айтматовпен бауырластық қарым-қатынасын жоғары бағалады. Ол Шахановты «Қырғызстанның халық ақыны» деп атап, оның «Желтоқсан» оқиғасы кезіндегі батылдығы мен шындықты айтудан тайсалмайтын «көкжал мінезін» еске алды.
Мұхтар Шахановтың қазасы түркі дүниесінің бірлігі мен достығына елеулі үлес қосқан қайраткердің қоштасуы ретінде қабылданды. Жапаров өз сөзін «Белді бекем буып, қайрат қылыңыздар, бауырлас қазақ халқы!» деген үндеумен аяқтады.
Мұхтар Шаханов — қазақ әдебиетіне өлшеусіз үлес қосқан заңғар тұлға. Ол өз ғұмырын шығармашылыққа, ұлт руханиятына арнап, кейінгі ұрпаққа өнеге болатын мол мұра қалдырды. Шығармалары әлемнің 50-ден астам тілінде жарық көрді.
