Еуразиялық экономикалық одақ органдарына төрағалық ету миссиясы биыл Қазақстанның еншісіне тиді. Менің ойымша, биылғы төрағалық кезеңінде еліміз жаңа нәтижелерге қол жеткізіп, одаққа мүше мемлекеттердің ортақ игілігін арттыру бағытында жүйелі жұмыс жүргізді деуге болады.
Президент ЕАЭО-ның экономикалық әлеуетін одан әрі нығайту қажеттігіне үнемі назар аударып келеді. Сондай-ақ интеграциялық бірлестікті дамытудың басым бағыттарын айқындап, нақты міндеттер қойып отыр. Одақ аясындағы саммиттер мен кездесулер барысында мемлекет басшылары үнемі ірі жобалар бойынша жол карталарын пысықтап, үкіметаралық қаржыландыру тетіктерін келісіп, бірлескен бастамаларды жеделдету мәселелерін талқылайды. Алдағы отырыстарда бұл механизм жаңаша түрленбек, себебі…
Сарапшы Айбар Олжаевтың айтуынша, қазіргі таңда әлем жаппай цифрлық трансформация мен жасанды интеллект дәуіріне қадам басты. Сондықтан уақыт ағымынан қалмай, заманауи технологияларды ЕАЭО-ға мүше елдер экономикасының барлық саласына енгізу мәселесі күн тәртібіне шықты. Меніңше, алдағы жылдардағы негізгі тақырыптарының бірі де осы болады. Мұндай жүйелер сауда ағындарын жоспарлауға, кедендік рәсімдерді жетілдіруге және баж салығының ықпалын тиімді бағалауға мүмкіндік береді.
«Сонымен қатар азаматтардың еркін қозғалысына кедергі келтіретін жасанды шектеулерді азайту, шекаралардағы жүк көліктерінің ұзын-сонар кезегін қысқарту мәселелері де өзекті болып отыр. Негізі ЕАЭО құрылғаннан бері кедергісіз сауда ортасын қалыптастыруға бағытталған көптеген құжат қабылданды. Дегенмен әлі де шешімін күткен мәселелер бар.
Осындай кедергілерді жедел анықтау үшін ЕАЭО елдерінің заңнамалық бастамаларына мониторинг жүргізетін жасанды интеллект технологияларын пайдалану мүмкіндігі қарастырылып жатыр. Ортақ экономикалық кеңістік құрылған соң, кедергісіз нарық пен тауарлардың еркін қозғалысын қамтамасыз ету басты міндеттердің бірі болуға тиіс.
Ресеймен ынтымақтастықтың маңызына тоқталсақ, Қазақстан үшін ең ірі экономика ретінде Ресеймен қарым-қатынас стратегиялық сипатқа ие және оның айқын басымдықтары бар», — дейді сарапшы.
Одақ әлеуметтік-экономикалық жағдайды бірден түбегейлі өзгертіп жіберетін қадамдарға бара қоймас деген пікірлер айтылып жатыр.
Алайда саммит аясында ұзақ мерзімді жобалар мен бағдарламаларға негіз болатын маңызды шешімдер қабылдануы мүмкін. Ал олардың нәтижесі болашақта халықтың тұрмыс сапасына және қатысушы мемлекеттердің экономикалық дамуына елеулі әсер ететіні сөзсіз.
