Осы мақсатта Қытайдан бас-аяғы 6,5 млрд доллар болатын инвестиция тартылды. Ауқымды уағдаластыққа шаһардың жобасын көршілерге таныстырған шенділер қол жеткізді.
Бұл жөнінде Мемлекет басшысына Премьер-Министрдің орынбасары Қанат Бозымбаев есеп берді. Кездесу барысында Мемлекет басшысы Қытайдағы Alatau City Roadshow халықаралық тұсаукесерінің қорытындылары, сондай-ақ су ресурстары, энергетика және тұрғын үй-коммуналдық шаруашылық саласындағы ірі инфрақұрылымдық жобалардың іске асырылуы туралы хабардар етілді,
Алатау қаласын дамытуға, коммуналдық инфрақұрылымды жаңғыртуға және өңірлерді сумен қамтамасыз ету мәселелеріне ерекше назар аударылды.
Роуд-шоу қорытындысы бойынша 30 келісімге қол қойылды Қанат Бозымбаев Президентке Қытай Халық Республикасында ұйымдастырылған Alatau City Roadshow-дың нәтижелері туралы баяндады.
Оның айтуынша, халықаралық тұсаукесер аясында бизнес өкілдерімен, инвесторлармен және ірі қалалардың басшыларымен 20 іс-шара мен кездесулер өтті. Жұмыс қорытындысы бойынша жалпы сомасы 6,4 миллиард доллар болатын 30 келісім мен меморандумға қол қойылды.
Сапар барысында Алатау қаласының инвестициялық мүмкіндіктері таныстырылды. Келіссөздер Шэньчжэнь қаласының, Гонконг әкімшілігінің, сондай-ақ ірі халықаралық компаниялардың басшылығымен өтті.
Алатау инвестиция тарту нүктесіне айналуы тиіс
Мемлекет басшысы Алатау қаласын дамытудың тұрақты моделін қалыптастырудың маңыздылығын атап өтті.
Кездесу қорытындысы бойынша Үкіметке қажетті инфрақұрылымды қаржыландыруды қамтамасыз ету және халықаралық капиталды тарту және инновациялық шешімдерді енгізу үшін қолайлы жағдайлар жасау тапсырылды.
«Энергетикалық және коммуналдық секторларды жаңғырту» ұлттық жобасын іске асыруға ерекше назар аударылды.
Аталып өткендей, 2026 жылы тұрғын үй-коммуналдық инфрақұрылымды жаңартуға 1,1 триллион теңгеден астам қаражат бағыттау жоспарланған. Бұл Қазақстанның тәуелсіздік жылдарындағы қаржыландырудың рекордтық көлемі.
Қаражат отандық және халықаралық қаржы институттарынан тартылатын болады. Жобаны іске асыру үш жыл ішінде коммуналдық желілердің тозу деңгейін 40 пайызға дейін төмендетуге мүмкіндік береді деп күтілуде.
Қазақстандық өндірушілер ірі жобаларға тартылады
Қасым-Жомарт Тоқаев отандық өндірушілердің энергетикалық және коммуналдық инфрақұрылымды жаңғырту жобаларына неғұрлым кеңінен қатысуы қажеттігін атап өтті. Мұндай тәсіл өнеркәсіпті дамытуға, жаңа жұмыс орындарын құруға және ірі инвестициялық жобалардағы қазақстандық қамту үлесін ұлғайтуға ықпал етуі тиіс.
Президентке сондай-ақ су ресурстары саласындағы жобалардың іске асырылуы туралы баяндалды.
Әңгіме гидротехникалық құрылыстарды жаңғырту, жаңа су қоймалары мен арналарды салу, сондай-ақ вегетациялық кезеңнің тұрақты өтуін қамтамасыз ету туралы болып отыр. Мемлекет басшысы бұл мәселені ерекше бақылауда ұстауды тапсырды, әсіресе еліміздің оңтүстік өңірлерінде суға деген сұраныс жоғары болып қалуда.
Бұл неге маңызды
Алатау қаласын дамыту Қазақстанның ірі инвестициялық жобаларының бірі ретінде қарастырылады. Сонымен бір мезгілде коммуналдық және энергетикалық инфрақұрылымды жаңғырту тіршілікті қамтамасыз ету жүйелерінің сенімділігін арттыруға, желілердің тозуын азайтуға және экономикалық өсу үшін қосымша мүмкіндіктер жасауға тиіс. Су жобаларын іске асыру ауыл шаруашылығы және өңірлердің орнықты дамуын қамтамасыз ету үшін стратегиялық мәнге ие.
