Премьер-Министр Олжас Бектенов мемлекеттік органдарға инфляцияны бақылауды күшейтуді және инвестициялық жобаларды іске асыру жөніндегі негізгі міндеттердің орындалуын қамтамасыз етуді тапсырды.
«Мемлекеттік органдар әрбір жобаны бақылауда ұстауы тиіс. Бұл ретте жыл бойы ауылда жұмыспен қамту үшін әкімдіктерге ірі шаруашылықтармен өзара іс-қимылды жандандыруды тапсырамын. Мал шаруашылығын дамытуға ерекше назар аударып, бөлінген қаражаттың мақсатты пайдаланылуын бақылау қажет», — деп тапсырды ол.
Бұдан басқа, Энергетика министрлігі мен QazaqGaz бір ай ішінде газ тарату желілерін салу және кеңейту жөніндегі жоспарларды өзектендіруді тапсырды.
«Оларды іске асыру мерзіміне қатаң мониторинг орнатып, аталған жобаларды толық және үздіксіз қаржыландыруды қамтамасыз ету қажет. Сондай-ақ қысқа мерзім ішінде авиаотынды сақтау және бөлу үшін объектілерді жаңғырту мен салудың егжей-тегжейлі жоспарын әзірлеу қажет. Бұл жұмыс серпінді дамып келе жатқан авиация саласының қажеттіліктерін толық қамтамасыз етуге кепілдік беру үшін озыңқы жолға қойылуға тиіс», — деп жалғады сөзін премьер.
Ол бұған дейін президенттің Көкшетау, Семей және Өскеменде үш көмір жылу электр стансасы құрылысының созылып кетуін сынға алғанын еске салды.
«Осыған байланысты генерация саласындағы жобаларды белгіленген мерзімде іске асыруды қамтамасыз етуді тапсырамын. Көлік саласында жаңа теміржол желілерін салу және вокзалдарды қайта жаңарту бойынша іске асырылып жатқан жобаларды аяқтау қажет. Астана әкімдігі қысқа мерзім ішінде жаңа әуежай жобасын іске асыруға кірісуі қажет. Үкімет барлық қажетті қолдауды көрсетеді», — деп атап өтті О.Бектенов.
