Кеңсай зиратында қазақ өнерінің алыбы, Қазақстанның Еңбек Ері, екі елдің Халық әртісі Асанәлі Әшімовтің бейітіне ескерткіш ашылды.Ескерткіштің бет пердесі түскен сәтте аспанда аппақ құс пайда болып, зиратты 3 рет айналып ұшты.
Жиналғандар мұны ұлы өнерпаздың рухына берілген игі белгі деп қабылдады.Ескерткіштің авторы – мүсінші Гүлфия Мендеш. Ол: «Асанәлі ағаның көзінің оты бөлек еді. Сол отты тасқа түсіруге тырыстым», – деді.Рәсімге жиналған әріптестері де естеліктерін айтты.
Мұхтар Әуезов театрының актері Нұржұман Ықтымбаев көзіне жас алып:
«Асанәлі аға сахнада тұрғанда, жаныңда алып тұрғандай боласың. Ол тек роль ойнамады, ол өмір сүрді. Бүгін біз Бекежанға, Шадияровқа, Қасымхановқа ескерткіш қойып отырмыз», – деді.
Шынында да, Асанәлі Әшімов сомдаған әр образ – ұлттық код. «Қыз Жібектегі» Бекежанның айбары, «Атаманның ақырындағы» Шадияровтың қайсарлығы, «Транссібір экспресіндегі» Қасымхановтың айлакерлігі, «Сарқырамадағы» Мәмбеттің қайғысы.
Актер Мемлекеттік сыйлықтың, Бүкілодақтық кинофестивальдің лауреаты. Әуезов театрының көркемдік жетекшісі, Қазақстан театрлары қауымдастығының президенті болған. Қаламгер ретінде «Майраның әні», «Ғұмыр-дария» деп жүрек сырын төкті.Бүгін Кеңсайда тұрған ескерткіш – тек мәрмәр емес. Бұл – ұрпаққа қалған сабақ. Ал аспанда қанат қаққан аппақ құс – Асанәлі Әшімов секілді тұлғалардың өлмейтінінің белгісі.
