Мемлекет басшысы Қасым-Жомарт Тоқаев елорда әуежайында мемлекеттік сапармен келген Бельгия королі Филипп пен королева Матильданы қарсы алды.
Бұл — Бельгия монархтарының Орталық Азияға жасаған алғашқы мемлекеттік сапары.Ақорданың хабарлауынша, корольдік жұп мінген борт Қазақстанның әуе шекарасынан бастап Астанаға дейін Әскери-әуе күштерінің жойғыш ұшақтарымен сүйемелденді. Әуе алаңында Құрмет қарауылының ротасы мен Президенттік оркестр сап түзеді.
Бір қызығы, король Филипп пен королева Матильда Астанаға Бельгияның үкіметтік бортымен емес, Air Astana-ның жоспарлы рейсімен келген
DalaNews дерегінше, бұған делегацияның үлкендігі себеп болған — құрамда 110 адам, оның ішінде 25-тен астам компания басшысы, ректорлар мен министрлер бар. Сондай-ақ бұл қадам — маусымда Тоқаевтың Брюссель сапарында Air Astana-ның 7,145 млрд еуроға ұшақ сатып алу келісімі мақұлданғаннан кейінгі дипломатиялық ишара ретінде бағаланған. Әуежайдағы салтанатты рәсімнен кейін қысқаша әңгімелесу өтті.
«Қазақстан сіздердің сапарыңызды зор қуанышпен қарсы алып отыр. Сіздер еліміздің дамуы үшін аса маңызды кезеңде келіп отырсыздар. Бұл сапар екіжақты қатынастарға қуатты серпін береді», – деді Президент.
«Ұшақтан түскен сәттен бастап көрсеткен ыстық ықыласыңыз үшін рахмет. Біз үш күн бойы Қазақстанмен жақынырақ танысуға ниеттіміз», – деді король Филипп.
Үш күндік бағдарламада не бар? Ресми бағдарлама 11-14 қазанды қамтиды. Астана мен Алматыны қамтитын сапар барысында:
- Жоғары деңгейдегі келіссөздер;
- «Қазақстан – Бельгия» іскерлік кеңесінің 4-отырысы;
- Екі ел ЖОО ректорларының форумы өтеді.
Екі форумға да Тоқаев пен король Филипп бірге қатысады деп жоспарланған. Айта кетейік, Филипп бұған дейін Қазақстанға үш рет келген, бірақ тақ мұрагері ретінде. 2002 және 2009 жылдары Байқоңырға бельгиялық ғарышкер Франк Де Винненің ұшуына байланысты келсе, 2010 жылы экономикалық миссияны басқарған.
Қандай құжаттарға қол қойылады?
Ақорданың ресми хабарламасында «сапар қорытындысы бойынша Бірлескен мәлімдеме қабылданып, бірқатар екіжақты құжатқа қол қойылады» делінген. Нақты тізім қол қойылғаннан кейін жарияланады. Бельгия — Қазақстанға соңғы 20 жылда 15 млрд долларға жуық инвестиция құйған, ең ірі 10 инвестордың бірі. Елде бельгиялық капиталы бар 110-нан астам компания жұмыс істейді, былтырғы тауар айналымы 580 млн доллардан асқан.
Сондықтан бұл жолғы құжаттардың басым бөлігі — коммерциялық келісімшарттар мен университеттер арасындағы меморандумдар болмақ. Басым бағыттар: көлік-логистика және Транскаспий дәлізі, ауыл шаруашылығы, сыни шикізаттар, жасанды интеллект және денсаулық сақтау.
