Бұл жерде Үкімет қате дерек берген жоқ, түзету де емес. Әңгіме екі түрлі экономикалық көрсеткіштің айырмасында болып тұр. Ұлттық экономика министрлігі мен Стратегиялық жоспарлау агенттігіне қарасты Ұлттық статистика бюросының дерегі мынадай:
Номиналды табыс 11,8 пайызға өсті
Бұл – азаматтың қолына тиген ақшаның тікелей өсімі, инфляция есепке алынбаған.Нақты табыс небәрі 0,1 пайызға өсті. Нақты табыс дегеніміз – номиналды табыстан инфляция мен баға өсімін (шамамен 10,3-11,7 пайыз) алып тастағандағы көрсеткіш. Яғни, ақшаның сатып алу қабілеті. Үкімет отырысында нақ осы 0,1 пайыз ресми түрде айтылды.
Көрсеткіштің аз болғаны соншалық, қоғамда «табысымыз бір пайызға да өспепті» деген талқылау шықты.Қарапайым тілмен айтсақ, халықтың қолындағы ақша қағаз жүзінде көбейгенімен, оның құны өспеген.
Ұлттық бюроның мәліметінше, жан басына шаққандағы орташа атаулы табыс бірінші тоқсанда 399 819 теңге, екінші тоқсанда 410 088 теңгеге жетіп, 12,9 пайызға өскен. Бірақ қымбатшылық сол өсімді жұтып қойды.
Осы цифрларды экономист Марат Әбдірахманов өз есебімен тексерді
ФСМС дерегінде жеке кәсіпкерлер мен өзін-өзі жұмыспен қамтығандар жарты жылда 43 миллиард теңге төлеген, былтырғыдан айырмашылық жоқ. Кәсіпорындар мен азаматтардың жарнасы 492 миллиардтан 596 миллиард теңгеге өскен.
Осы төлемдерден есептегенде, экономикадағы белсенді төлеуші бес миллионнан аспайды. Бұл ресми айтылған медианалық жалақы дерегімен қабыспайды. Ұлттық статистикада жалдамалы қызметкер төрт миллион деп көрсетілген, олардың жарты жылдық жалақы қоры үш триллион теңге шамасында.
Ал Қаржы министрлігінің сайтындағы түсімдерге келсек, заң өзгерген соң жергілікті салықтың көбі республикалық бюджетке ауысқан. Сондықтан өсім туралы айту үшін квазимемлекеттік және шикізат секторын қоспағанда, мемлекеттік бюджетке түскен барлық кірісті бірге салыстыру керек.
Бүгінгі «өстік» деген мәлімдеме нақ осы есептің ауысуынан шығып отыр
Марат Әбдірахмановтың пайымынша, министрлік сайтында өсімді дәлелдейтін нақты цифр жоқ. Керісінше, мемлекеттік қарыз бен тапшылықтың өсуіне қараса, түсім былтырғыдан жиырма пайызға кеміп отыр. Бұл былтырғы фискалдық болжаммен дәл келеді.
Демек, Үкімет өз дерегінен жаңылған жоқ, тек инфляцияның кесірінен қолдағы ақша көбейгенімен, оның нақты құны 0,1 пайыздан аспай қалғанын ресми статистика дәлелдеп берді.
