Қазақстандық қор биржасы еуромен есеп айырысуды бастау мүмкіндігін зерттеп жатыр. Бұл бастама сауда операцияларының тартымдылығын арттырып, KASE-нің халықаралық деңгейдегі позициясын күшейтуге жол ашуы мүмкін. Сарапшылардың айтуынша, бірнеше фактор әсер еткен.
• еуроның Қазақстанның халықаралық саудасындағы маңызы,
• Еуропа елдерімен орныққан сауда және инвестициялық байланыстар,
• сондай-ақ нарық қатысушылары тарапынан валюталық есеп айырысуды әртараптандыруға деген сұраныс бар.
Сарапшылардың айтуынша, бұл мәселенің шешімі бірер күнде анықтала салмайды.
• Біріншіден, деңгейлі банктер мен институционалдық инвесторлар тарапынан тұрақты сұраныс болу керек,
• клиринг, депозитарий және төлем жүйелерін қамтитын техникалық инфрақұрылымның дайындығы, сондай-ақ тиісті реттеуші органдардың келісімі ескерілуі тиіс.
«Өткізілген кездесулер, нарық қатысушыларының тілектеріне сауалнама жүргізу қорытындысы бойынша биржа еуромен (EUR) есеп айырысуды бастау мүмкіндігін қарастырады. Еуроға деген қызығушылық оның Қазақстанның сыртқы экономикалық қызметі үшін маңыздылығына, еуропалық юрисдикциялармен тұрақты сауда-инвестициялық байланыстардың болуына, сондай-ақ нарықтың жекелеген қатысушылары тарапынан бағалы қағаздар мен биржалық операциялар бойынша есеп айырысу валюталары тізбесін кеңейтуге деген сұраныстарға негізделген», — делінген редакцияның сауалына берілген жауапта.
Сонымен қатар, қазір биржа дирхамға байланысты құралдарды іске қосу бойынша тұжырымдамалық және операциялық жұмысты аяқтауда: AED/KZT валюталық жұбы және қор нарығында осы валютада номинирленген бағалы қағаздарды бастапқы орналастыру мүмкіндігі.
«Бұл жұмысты 2026 жылдың І тоқсанының соңына дейін аяқтау жоспарланған», — деп баса айтты KASE-де.
Тұтастай алғанда, есептеулерді іске қосу үшін жаңа валюта қосу туралы шешімді факторлар жиынтығын кешенді бағалау негізінде биржа қабылдайды. Ең алдымен, эмитенттер, инвесторлар және кәсіби қатысушылар тарапынан расталған және орнықты нарықтық сұраныстың болуы, сондай-ақ маркет-мейкер не сауда-саттықты қолдаудың өзге тетіктерінің болуын қоса алғанда, тиісті валюта мен құралдар бойынша жеткілікті өтімділікті қамтамасыз ету мүмкіндігі ескеріледі.
«Сыртқы экономикалық қызметте, инвестициялық ағымдар мен ҚР қаржы жүйесінде валютаның стратегиялық рөлі елеулі мәнге ие», — деп толықтырды KASE-де.
Бұдан басқа, реттеушілік және инфрақұрылымдық дайындық, сондай-ақ жаңа валютаны іске қосудың экономикалық орындылығы назарға алынады.
Еске сала кетейік, 2025 жылдың наурызында биржада бағалы қағаздарды орналастыру мамандандырылған сауда-саттық, жазылу және юаньмен есеп айырысу (CNY) әдісімен жүзеге асырылды.
