Санкт-Петербургте 3-6 маусым арасында өтіп жатқан халықаралық экономикалық форумда РФ Президенті В. Путин Қазақстан Ресей үшін «оңай серіктес емес» деп мәлімдеді.
Оның айтуынша, қаржы мен өнеркәсіптен бастап инвестиция мен ірі бірлескен жобаларға дейінгі әрбір мәселе бойынша елдер арасында өткір пікірталастар жүріп жатыр.
Осыған дейін:
- 29 мамырда Путин Ресей мен Қазақстан арасындағы жақын, тату көршілік және іс жүзінде туыстық қарым-қатынастарды сақтау бірінші кезекте маңызды екенін мәлімдеді. Ол мұндай байланыстар екі мемлекет арасындағы сенімнің жоғары деңгейін қалыптастырып, болашақта ұзақ мерзімді ынтымақтастықтың негізін қалайтынын түсіндірді.
- 28 мамырда Ресей көшбасшысы Мәскеу мен Астананың тауар айналымы таяу арада 30 млрд доллардан асатынын хабарлады. Путин 2025 жылдың қорытындысы бойынша өзара сауда көлемі 29 млрд долларға жақындағанын атап өтті.
Путин Ресей мен Қазақстан қарым-қатынасы табысты дамып келе жатқанын, бірақ тараптар арасындағы келіссөздер әрқашан оңай өтпейтінін атап өтті.
«Бұл ретте біздің қазақстандық достарымыз, серіктестеріміз онша жеңіл серіктес еместігін бірден атап өткім келеді. Бізде әр мәселе бойынша дерлік өте қызу пікірталас жүреді. Бұл қаржылық қатынастарға, өнеркәсіптегі қатынастарға, инвестициялық қызметтегі жағдайларға, қандай да бір ірі жобаларға қатысты. Бірақ бір жағынан да, екінші жағынан да екі тарапты қанағаттандырып қана қоймай, ортақ мақсаттарға жетуге ықпал ететін ымыраға келу ниеті бар. Ал ортақ мақсат — Қазақстан мен Ресей азаматтарының дамуы мен әл-ауқаты», — деді Владимир Путин.
