Экономика мен төлем балансының жай-күйі теңгенің тұрақтылығын сақтайды.
Бұл туралы 10 шілдедегі брифингте Ұлттық банк төрағасы Тимур Сүлейменов мәлімдеп, соңғы сегіз айда теңгенің реттеушінің араласуынсыз өзі нығайғанына назар аударды.
«Өкінішке қарай, сарапшылар қауымдастығында және көбінесе қоғамда теңгенің тек төмен қарай, ал доллар тек жоғары қарай жылжуы мүмкін деген түсінік бар еді. Ұлттық банк тарапынан қандай да бір араласусыз бағам нығайып келе жатқанын өздеріңіз көріп отырсыздар. Неге? Себебі экономика өзін мықты және сенімді сезінеді. Бізде экспорт өсуде, импорт, негізінен, сол деңгейде қалып отыр және валютаға сұраныс пен ұсыныс арасындағы дельта бағамның тұрақтылығын қамтамасыз ететін деңгейде сақталып отыр», — деді Сүлейменов.
Қосымша теңгені резидент еместердің портфельдік инвестициялары қолдайды. Төлем балансының жақсаруы да рөл атқарады.
«Іргелі түрде экономика мықты. Өткен жылы бізде төлем балансы тапшы болды, биыл профицит болуы мүмкін. Бұл өте жақсы макроэкономикалық көрсеткіш. Импорт деңгейі шамамен сол деңгейде сақталып отыр, сондықтан валютаға деген орасан зор қосымша сұраныс байқалмайды. Сондықтан қарапайым экономикалық және нарықтық талдауға сүйенсек, доллар бағамы айтарлықтай өзгермейді», — деп толықтырды Ұлттық банк басшысы.
Бұған дейін біз Ұлттық банк келесі аптада квазимемлекеттік сектор компанияларын экспорттық валюта түсімінің жартысын ішкі нарықта сатуға міндеттейтін талапты алып тастайтынын жазғанбыз.
