Биыл Алматыда Абай даңғылы мен Саин көшесін ҮАААЖ-ға жеткізу жоспарлануда: Қала әкімдігінің хабарлауынша, Абай, Рысқұлов даңғылдарын және Саин көшесін Үлкен Алматы айналма жолына дейін жеткізу жұмыстары жалғасып жатыр.
Бүгінде нысандардың құрылыс дайындығы шамамен 50% -ға дейін жеткізілді. Ақсай өзені арқылы өтетін көпірлерді, ҮАААЖ арқылы өтетін жол өткелдерін және теміржолдарды қоса алғанда, жасанды құрылыстар салынуда.
Сондай-ақ жер телімдерін сатып алу жалғасуда. Абай даңғылы бойынша 82 учаскенің 71-і сатып алынды, Рысқұлов даңғылы бойынша 190 учаскенің 172-сі сатып алынды. Саин көшесінде сатып алу рәсімдері аяқталды.
Мегаполис әкімі Дархан Сатыбалды өткен жылы қала бюджеті есебінен ҮАААЖ-ға дейінгі жолдарды өз бетінше аяқтау үшін облыс аумағындағы жер телімдерін сатып алуды аяқтау туралы шешім қабылданғанын атап өтті.
«Барлық жобалар бізге берілді, қазір оларды түзету жүргізілуде, алайда жұмыстар қатар жалғасуда. Құрылысқа қаражат қарастырылған, мердігерлік ұйымдар бар. Осы жылы Абай даңғылы мен Саин көшесінің бойымен ҮАААЖ-ға өтуді қамтамасыз етуді міндет етіп қоямын», — деп атап өтті Д.Сатыбалды.
Болашақта Алматының ҮАААЖ-мен байланысын алты радиалдық магистраль арқылы қамтамасыз ету жоспарланып отыр. Абай, Рысқұлов даңғылдары мен Сайын көшесіндегі жобалардан басқа Тілендиев, Ақын Сара және Солтүстік айналым көшелерін тесу жұмыстары жалғасуда.
