Мәжілісмен Марат Бәшімовтың айтуынша, Құрылтай бес жылға сайланатын 145 депутаттан тұрады.
«Құрылтай төрағасының Құрылтай сайлайтын үш орынбасары бар. Құрылтай президентке вице-президентті, премьер-министрді, Конституциялық соттың судьяларын, Орталық сайлау комиссиясының және Жоғары аудиторлық палатаның мүшелерін қызметке тағайындауға келісім береді. Сонымен қатар, Құрылтай депутаттарына президенттің ұсынысы бойынша Жоғарғы сот судьяларын сайлау өкілеттігін беру ұсынылады. Заң жобасында Құрылтайды Конституциялық сот судьялары мен Жоғарғы сот судьялары қол сұғылмаушылығынан айыру тетігі туралы нормалар жазылған», — деп хабарлады ол.
Құжатта сондай-ақ депутаттық әдеп қағидалары бекітіледі.
«Мемлекеттік бюджетке қатысты депутаттық бастамаларға үкімет қорытындыларын ұсыну мерзімі Конституциялық заң деңгейінде айқындалған және үш айды құрайтын болады. Құрылтай мен үкімет арасындағы өзара іс-қимылдың мынадай тетіктері белгіленген: үкімет мүшелерін лауазымға тағайындау үшін кандидатуралар бойынша Құрылтаймен консультациялар өткізу, өз қызметі мәселелері бойынша үкімет мүшесінің есеп беру тәртібі, Құрылтай отырысында премьер-министрдің үкімет қызметі туралы баяндамасы, үкіметке сенімсіздік білдіру тәртібі», — деп жалғады сөзін М.Бәшімов.
Айта кетейік, Парламент «ҚР Құрылтайы және оның депутаттарының мәртебесі туралы» заң жобасын екінші оқылымда қабылдады.
