19 шілдеден бастап Қазақстанда тауарлар мен қызметтерге ақы төлеу үшін бірыңғай QR-код ресми түрде іске қосылады.
Енді сатып алушыларға «өз» банкінің QR-кодын іздеуге немесе сатушыдан қандай банк қосымшасы арқылы сатып алуды төлеуге болатынын анықтауға тура келмейді. Кез келген банктің мобильдік қосымшасын ашып, бірыңғай QR сканерлеу жеткілікті,
18 шілдеге дейін бөлшек төлемдерді қабылдау және өңдеу бойынша қызмет көрсететін барлық банктер Мобильдік төлемдердің банкаралық жүйесіне қосылуы тиіс болатын. Мұндай талап «Банктер және банк қызметі туралы» Заңға түзетулерде көзделген.
Жаңалық қолма-қол ақшасыз төлемдердің бірыңғай инфрақұрылымын құруға бағытталған. Бизнес үшін бұл түрлі банктердің клиенттерінен бірнеше емес, бір QR-код бойынша төлемдерді қабылдау мүмкіндігін білдіреді. Тұтынушылар үшін — нақты банкке немесе төлем сервисіне байланыстырмай неғұрлым ыңғайлы төлем. Бұл ретте сауда нүктесіндегі POS-терминалдар саны бұрынғыдай кәсіпкердің қарауында қалады.
Ұлттық банк төрағасы Тимур Сүлейменов жобаны іске асыру екінші деңгейлі банктерден үйлесімділікті, қауіпсіздікті және төлемдерді дұрыс өңдеуді қамтамасыз ету үшін техникалық жүйелерді жаңғыртуды талап еткенін атап өтті. Оның айтуынша, ұлттық цифрлық қаржы инфрақұрылымын дамыту заманауи цифрлық мемлекет құру жолындағы маңызды қадам болып табылады.
Реттеуші басшысы жүйені іске қосқаннан кейін клиенттер бірыңғай QR-кодты пайдалана отырып, өз банктерінің әдеттегі мобильді қосымшалары арқылы тауарлар мен қызметтерді кедергісіз төлей алатынын атап өтті.
